Një polic dhe një inspektor i lartë janë arrestuar në flagrancë, pasi kanë abuzuar me detyrën. Sektori i Krimit Ekonomiko Financiar në bashkëpunim me Shërbimin e Çështjeve të Brendshme dhe Ankesave (SH.Ç.B.A), dhe Drejtorinë e Standarteve Profesionale, kanë përfunduar me sukses operacionin “Ndërtimi 3”, ku arrestuan në flagrancë shtetasit:
1. Roland Skënderi, 40 vjeç, banues në Tiranë , me detyrë oficer policie për Krimet, në Komisariatin e Policisë nr.2, Tiranë.
2. Shyqyri Gega, 50 vjeç, banues në Tiranë, me profesion Inxhinier Gjeolog, i punësuar si Inspektor i lartë tek IMT Bashkia Tiranë.
Proçedimi i këtyre shtetasve u bë për veprën penale “Ndërtim pa leje”, dhe “shpërdorim detyre”, pasi më datë 23.08.2017, në vendin e quajtur rr. Muhamet Gjollesha, pallati ML, Skënderi ka kryer ndërtim pa lejen e organeve kompetente, konkretisht një lokal bar kafe.
Ata kanë lejuar ndërtimin e pallatit pa leje, duke u mjaftuar me pezullim të punimeve dhe pa njoftuar policinë e shtetit në kundërshtim me ligjet në fuqi.
Gjithashtu nga Drejtoria Vendore e Policisë Tiranë dhe nga Drejtoria e Standarteve Profesionale në Drejtorinë e Përgjithshme të Policisë së Shtetit janë marrë masa administrative për oficerët e policisë si më poshtë:
➢ Shkarkim nga detyra për shefin e Komisariatit të Policisë nr.2 Tiranë.
➢ U shkarkua nga detyra dhe ka filluar hetimi disiplinor për Shefin e policimit në komunitet, pranë komisariatit nr.2-Tiranë.
➢ U shkarkua nga detyra dhe ka filluar hetimi disiplinor për Specialistin e policisë kriminale (që mbulon zonën), pranë komisariatit nr.2-Tiranë.
➢ U shkarkua nga detyra dhe filloi hetimi disiplinor për Specialistin e policisë së rendit (që mbulon zonën), pranë komisariatit nr.2-Tiranë.
Po në lidhje me këtë ndërtim pa leje janë kryer veprime proceduriale penale mbi dyshimet për implikim të punonjësve të policisë pranë Komisariatit nr.2, Tiranë, të cilët kanë marre dijeni apo nuk kanë kryer detyrat funksionale sipas procedurave standarde për ndërtimet pa leje. Materialet do t’i referohen Prokurorisë së Rrethit Gjyqësor Tiranë për vlerësim të mëtejshëm.
