Indiani i akuzuar Nitin Sandesara, i cili sëbashku me vëllain e tij akuzohen në vendin e tyre për një mashtrim të disa bankave në vlerën mbi 725 milionë dollarë u emërua konsull nderi të Shqipërisë në Nigeri. Ky emërim është bërë gjatë kohës që ministër i Jashtëm ishte Ditmir Bushati.
Bushati ka reaguar me anë të një postimi në ‘Facebook’ dhe sqaron procedurën e emërimit të konsujve të nderit. Ai shprehet se ato janë të përcaktuara qartë në Konventën e Vjenës për Marrëdhëniet Diplomatike dhe se, sipas tij procedura është respektuar në mënyrë rigoroze.
“Një prej rregullave më elementare të gazetarisë dhe informimit publik në një shoqëri demokratike është verifikimi i fakteve, rregullave dhe procedurave ligjore që udhëheqin një proces, për të cilin raportohet. Sikundër kontaktimi i institucioneve dhe personave të përmendur në lajm me qëllim informimin e paanshëm dhe zbardhjen e të vërtetës.
Për sa kohë kjo nuk ka ndodhur me lajmin e publikuar në Top Channel, e ndjej për detyrë të informoj opinionin publik se procedurat për emërimin e konsujve të nderit janë të përcaktuara qartë në Konventën e Vjenës për Marrëdhëniet Diplomatike. Në çdo rast janë agjencitë e specializuara të vendit propozues dhe atij pritës që kryejnë verifikimin e pastërtisë së personit. Mjafton hulumtimi i dokumentacionit për këtë rast për të kuptuar se është zbatuar në menyrë rigoroze procedura”, shkruan Bushati.
