Pas deklaratës se në protestën e 8 janarit të organizuar nga Sali Berisha do të vritej një deputet në oborrin e PD-së, Spartak Braho ka përfunduar në SPAK. Ka qenë deputeti Flamur Noka, i cili ka depozituar pranë Gjykatës së Posaçme Antikorrupsion kërkesë-padinë për Brahon.
Braho akuzohet nga Komisioni i Rithemelimit, për kryerjen e veprës penale të “shpifjes”. Para protestës së 8 janarit, ish-deputeti, në një studio televizive paralajmëronte se tubimi i thirrur nga Sali Berisha, do të kishte skenarë të dhunshëm, madje sipas tij, do të përfundonte edhe me viktima, duke përmendur një deputet me inicialet E.A.
Ditë më parë, Noka i bëri thirrje institucionit të akuzës që të hetojë ish-deputetin e Partisë Socialiste, Spartak Braho. Noka akuzonte Brahon se ka inskenuar lajme dhe pretendime të rreme, se në protestën e 8 janarit në selinë e PD-së, rrezikohej jeta e deputetit demokrat E.A.
“Data 8 janar e dëshmoi qartësisht, pengmarrësin dhe pengun si dy persona minues të pluralizmit dhe demokracisë. Arsyeja e vetme ishte pengmarrja e opozitës. Sot me urdhër të pengmarrësit isha i thirrur në Prokurori, për një protestë demokratike, legjitime dhe më paqësore e zhvilluar ndonjëherë. Për cilësinë duhet të pyesni urdhëruesit. Unë sot i bëra thirrje Prokurorisë, të hetojë për një mashtrim publik që pengu u ka bërë shqiptarëve dhe ndërkombëtarëve në datë 18 dhjetor, duke sajuar numra të gënjeshtërt, duke mashtruar për 5004 delegatë, duke falsifikuar firma. Sot i bëra thirrje Prokurorisë të hetojë edhe dhunen ushtruar nga policia mbi demokratët në shtëpinë e tyre. I bëra thirrje që të hetojë edhe një zjarrvënës si Spartak Braho që përhap terror dhe panik duke sajuar lajme. Të hetojnë dhe Sokol Bizhga që ushtroi dhunë. Asgjë, as thirrjet në Prokurori dhe as dhuna e pushtetit dhe e bandave nuk ndalojnë vullnetin e demokratëve. Shteti dhe pushteti duhet të hetojnë banditët që ai kishte mbushur shtëpinë e lirisë”, deklaroi ai.
Deputeti Flamur Noka dhe ish-kryeministri Sali Berisha dhanë dëshmitë e tyre para prokurorëve të çështjes së protestës së 8 janarit në PD, ndërsa njëzëri mohuan se në tubimin para selisë blu, u ushtrua dhunë prej mbështetësve të tyre.
