SHBA u ka bërë thirrje qytetarëve të saj, që të jenë vigjilentë kundër dhunës së mundshme anti-amerikane jashtë vendit pas vrasjes së liderit të Al-Kaedës, Ayman al-Zawahiri. Vdekja e tij mund të shtyjë mbështetësit e Al-Kaedës ose grupe të tjera terroriste, të synojnë objektet dhe personelin amerikan, tha Departamenti i Shtetit.
Zawahiri u vra nga një dron amerikan në kryeqytetin afgan, Kabul, të dielën. Ai kishte ndihmuar në organizimin e sulmeve të 11 shtatorit në SHBA, ku humbën jetën gati 3000 njerëz.
Mjeku 71-vjeçar egjiptian mori drejtimin e Al-Kaedës pas vdekjes së Osama Bin Ladenit, në vitin 2011. Vrasja u konfirmua të hënën nga presidenti amerikan Joe Biden, i cili tha se Zawahiri kishte gdhendur “një gjurmë vrasjesh dhe dhune” kundër qytetarëve amerikanë.
Presidenti amerikan Joe Biden deklaroi se Zawahiri kishte organizuar gjithashtu akte të tjera dhune, duke përfshirë bombardimin vetëvrasës të destrojerit detar USS Cole në Aden në tetor 2000, i cili vrau 17 marinarë amerikanë dhe sulmet e vitit 1998 ndaj Ambasadave Amerikane në Kenia dhe Tanzani, në të cilat 223 njerëz vdiqën.
“Departamenti i Shtetit beson se ka një potencial më të lartë për dhunë anti-amerikane, duke pasur parasysh vdekjen e Ayman al-Zawahiri më 31 korrik 2022”, tha departamenti.
“Informacionet aktuale sugjerojnë se organizatat terroriste vazhdojnë të planifikojnë sulme terroriste kundër interesave të SHBA-së në rajone të shumta anembanë globit”. “Këto sulme mund të përdorin një shumëllojshmëri të gjerë taktikash duke përfshirë operacione vetëvrasëse, atentate, rrëmbime dhe bomba”.
Burimi i lajmit: BBC. Përshtatur nga Tirana Today
