Ish-shefi i antidrogës në Malin e Zi, Rudolf Elezoviç, i cili u gjet i vrarë, kishte lënë pistoletën në shtëpi e më tej u zhduk. Kolegët e tj e cilësojnë si një njeri guximtar, i gatshëm që të përballej me kriminelët, duke hedhur poshtë pretendimet se ai mund të ishte i përfshirë në trafikun e drogës.
Elezoviç kishte lënë pistoletën e shërbimit në shtëpi përpara se të dilte, ku hetuesit dyshojnë se shkoi në një takim me një person të panjohur, dhe më pas telefonoi familjen duke i njoftuar se po shkonte në Shkodër dhe se do të kthehej shpejt.
Kolegët e tij hedhin poshtë në mënyrë kategorike faktin se ish-shefi i anti-drogës në Ulqin mund të ishte i përfshirë në trafikun e drogës.
Elezoviç konsiderohej “një polic i guximshëm, i ndershëm, i gatshëm të përballej me kriminelët më mizorë”, citojnë mediat e vendit fqinj qarqet policore.
Ekspertiza ka konfirmuar se ish-shefi i antidrogës në Malin e Zi është vrarë me 1 plumb në kokë. Po të njëjtat burime shtojnë se policia nuk ka gjetur armën me të cilën është vrarë apo gëzhojën.
Pranë trupit nuk është gjetur asnjë provë në ndihmë të grupit hetimor. Hetuesit kanë dyshime të forta se oficeri i antidrogës së Ulqinit dhe Tivarit është ekzekutuar në një vend tjetër, dhe më pas është çuar buzë lumit Buna. Fillimisht u dyshua se Elezoviç ishte vetëvrarë, por pas hetimeve dhe këqyrjes së plagës, u arrit në konkluzionin se ai ishte ekzekutuar.
