“Arrest në burg” është masa e caktuar nga Gjykata e Kurbinit për babë e bir dhe shokun e tyre, të cilët u arrestuan për vrasjen e Rakip Rolit në Laç. Gjykata ka caktuar “arrest në burg” për Llej e Skënder Lika dhe Klajdi Gjegjajn (Beleshi). Ndaj tyre, rëndojnë akuzat për “vrasje me paramendim e kryer në bashkëpunim” dhe “armëmbajtje pa leje”.
22-vjeçari Llej Lika i ka qëndruar deklarimeve se është ai autor i krimit, ndërsa dy bashkëpunetorët e tij, i ati dhe shoku, nuk kanë folur. “Vrasjen e kam bërë unë dhe babai e shoku im nuk kanë asnjë lidhje me ngjarjen”. Kjo ka qenë dëshmia e dhënë në polici nga 22-vjeçari Llej Lika, i cili së bashku me të atin e tij, Skënder Lika dhe Klajdi Gjegjajn (Beleshi) u arrestuan për vrasjen e biznesmenit Rakip Roli.
I riu ka thënë para hetuesve se vrasjen e ka kryer në shenjë hakmarrje, pasi djemtë e viktimës e kishin dhunuar barbarisht në muajin korrik të këtij viti.
Biznesmeni i materialeve të ndërtimit, Rakip Roli, apo i njohur ndryshe dhe me emrin Pilot u ekzekutua me breshëri plumbash teksa po lëvizte me automjetin e tij luksoz Audi Q7. 55-vjeçari u ekzekutua mëngjesin e së premtes në Laç, me breshëri kallashnikovi. Ai po lëvizte me makinë luksoze tip Audi Q7, në momentin që është qëlluar për vdekje.
