Detaje të tjera janë zbardhur në lidhje me ekzekutimin e biznesmenit Ruzhdi Hoxha. Një bari në zonën e Qafë-Mollës në Dajt, ku u gjet i vrarë biznesmeni, ka thënë se kishin dyshime se ishte një kafshë e ngordhur në atë vend, kjo si pasojë e një arome të rëndë që ishte përhapur.
“Ka një javë që kam qenë unë. Vinte erë e keqe. Vinin korbat aty dhe lëviznin rreth e rrotull. Thashë hajd mo, ndonjë gjë e ngordhur. Nuk më shkoi mendja kurrë për njeri”, është shprehur ai për “Tv Klan”.
Trupi i viktimës u gjet pak ditë më parë, i mbuluar me zhavorr, ndërkohë që ka qenë gjysmë i dekompozuar. Kjo vërteton se ai mund të jetë vrarë që në ditën e parë të zhdukjes së tij, rreth dy javë më parë.
Hetuesit kanë rindërtuar itinerarin e lëvizjes dhe dinamikën e krimit, ku konfirmohet edhe me pamje filmike nga disa biznese, se Fredi Rrushi ka udhëtuar së bashku me Ruzhdi Hoxhën drejt Dajtit. Pasi janë përleshur fizikisht, Fredi Rrushi e ka vrarë me dy plumba dhe është kthyer rreth orës 15:00 më 20 tetor.
Mëngjesin e 21 tetorit, kur ora shënonte 05:00, Rrushi rezulton se ka shkuar sërish në Dajt e këtë herë, sipas hetuesve për të fshehur trupin e viktimës të cilin e ka mbuluar me dhe, gurë e shkurre në këtë zonë.
Ndaj Fredi Rrushit rëndojnë tre akuza; “vrasja me paramendim”, “armëmbajtje pa leje” dhe “zhdukje kufome”. Ndërsa vëllai i tij Pajtim Rrushi është arrestuar për “moskallëzim krimi” e “veprime që pengojnë zbardhjen e të vërtetës” dhe të dy të mërkurën do të dalin para gjykatës. Pajtim Rrushi ka deklaruar se nuk mbante mend asgjë, pasi COVID e kishte lënë me pasoja.
Të dy, Rruzhdi Hoxha dhe Fredi Rrush, janë përfshirë prej kohësh në aktivitetet kriminale, nga “mashtimi”, “vjedhja” dhe “kultivimi drogës”.
