Ndonëse policia e Elbasanit deklaroi se nga veprimet hetimore nuk kishte persona të marrë peng, mësohet se sot janë arrestuar autorët dhe është liruar adoleshenti. Ky i fundit ishte marrë me forcë nga një makinë, bën me dije “balkanweb”. Ngjarja erdhi pas një përleshjeje mes dy grupeve adoleshentësh mbrëmjen e djeshme, rreth orës 22:20 pranë stadiumit në Elbasan. Dyshohet se të paktën 13 adoleshentë janë përfshirë në skena të dhunshme. Më pas njëri nga grupet ka marrë forcërisht një prej të rinjve, dhe janë larguar me makinë.
Ja çfarë njoftonte më herët policia
“Rreth orës 22:20, jemi njoftuar se në afërsi të Pallatit të Sportit disa adoleshentë janë konfliktuar ndërmjet njeri- tjetrit. Në konflikt e sipër sipas të dhënave të ardhura në sallën operative, dyshohet se njëra nga palët është larguar me një automjet duke marrë me vete dhe një person tjetër pa dëshirën e tij.
Nga veprimet paraprake të kryera në vendin e ngjarjes, nuk mund të konfirmohet ky fakt i pretenduar në telefonatën e ardhur në sallën operative.
Policia po punon për sqarimin e rrethanave dhe vërtetësinë e ngjarjes, ndërkohë janë intensifikuar masat e sigurisë në qytet”, njoftoi policia në mesnatë.
