Dy turistë izraelitë janë përfshirë në një aksident të ndodhur në unazën jugore të Elbasanit. Sipas policisë, 2 makina janë përplasur me njëra-tjetrën në këtë rrugë, teksa në këtë përplasje është përfshirë edhe motoçikleta e drejtuar nga një shtetas izraelit.
Drejtuesi i mjetit N.S., banues në Izrael mësohet të jetë jashtë rrezikut për jetën, ndërsa pasagjerja që ndodhej me të po kurohet në Spitalin Rajonal të Elbasanit. Burime nga spitali thanë për ‘BalkanWeb’, se shoqëruesja e tij ka marrë plagë të shumta, pasi makina me të cilën u përplasën e ka marrë para duke e zënë poshtë.
Njoftimi i policisë:
Rreth orës 14.15, në Elbasan, mjeti tip “Toyota” me drejtues shtetasin F. P, banues në Elbasan, është përplasur me mjetin tip “Audi”, me drejtues shtetasin B.U, banues në Elbasan. Në përplasje është përfshirë dhe motoçikleta tip “Honda” me drejtues shtetasin N.S., banues në Izrael, i cili si pasojë e përfshirjen në përplasje është dëmtuar vetë dhe pasagjerja shtetësia M.N., me banim në Izrael, të cilët ndodhen në Spitalin Rajonal Elbasan, nën kujdesin e mjekëve.
Drejtuesit e automjeteve janë shoqëruar në Komisariatin e Policisë Elbasan, për veprime të mëtejshme procedurale. Grupi hetimor ndodhet në vendngjarje dhe po punon për zbardhjen e shkakut të aksidentit.
