Presidenti i Haitit, Jovenel Moïse është vrarë në një sulm në rezidencën e tij private. Lajmin e ka bërë të ditur kryeministri i vendit Claude Joseph, me anë të një deklarate për shtyp. Gruaja e Moïse thuhet gjithashtu se ishte plagosur gjatë një sulmi vdekjeprurës në rezidencën presidenciale.
Një deklaratë nga kryeministri i përkohshëm i Haitit, Claude Joseph, tha se sulmi vdekjeprurës ndodhi në orët e para të mëngjesit të së mërkurës. “Një grup individësh që nuk janë identifikuar, disa prej të cilëve flisnin spanjisht, sulmuan rezidencën private të presidentit dhe vranë Kryetarin e Shtetit,” shkroi kryeministri.
Joseph tha se zonja e parë u qëllua gjithashtu, por i mbijetoi sulmit. Ai dënoi “aktin e urryer, çnjerëzor dhe barbar”, dhe bëri thirrje për qetësi, duke shtuar: “Të gjitha masat janë marrë për të siguruar vazhdimësinë e shtetit, dhe për të mbrojtur Kombin. Demokracia dhe Republika do të fitojnë”.
AFP gjithashtu citoi Joseph-in duke thënë se ai ka marrë kontrollin e vendit, dhe duke fajësuar të huajt për sulmin fatal. “Presidenti u vra në shtëpinë e tij nga të huajt që flisnin anglisht dhe spanjisht”, thuhet të ketë thënë ai.
Më herët ka patur trazira në vend. Haiti u trondit nga protesta masive anti-qeveritare, ku me mijëra qytetarë dolën në rrugë në shkurt, për të vënë në dyshim legjitimitetin e presidencës së Moïse.
Vrasja e presidentit vjen pas thellimit të stabilitetit politik dhe ekonomik, dhe një rritje të dhunës së bandave. Qeverisja e tij u përball me shumë akuza për korrupsion, dhe për këtë gjë në vend shpërthyen protestat e dhunshme anti-qeveritare.
