Një i ri është vrarë me armë zjarri në Tiranë pas mesnate. Ngjarja e rëndë ka ndodhur në rrugën “Irfan Tomini”, ku është qëlluar me armë zjarri, dhe për pasojë ka ndërruar jetë 29-vjeçari Jurgen Duka (Mëziri).
Dyshohet se viktima bashkë me shokun e tij me inicialet O. D., kanë hyrë në një market dhe pas një debati kanë nisur një konflikt me një person tjetër të pa identifikuar. Ky i fundit ka qëlluar me armë, dhe nga plagët e marra ndërroi jetë tek Trauma, Jurgen Duka.
Sipas policisë, nga verifikimet e kryera rezulton se viktima është person me precedentë të mëparshëm kriminal.
Në vitin 2020, ai u arrestua së bashku me Elison Hysenbelli, në kuadër të operacionit anti-drogë mes Italisë dhe Shqipërisë, të koduar “Riviera”, dhe do ekstradohej drejt vendit fqinj për t’u gjykuar. Mbetet e paqartë se si viktima u lirua nga qelia. Ndërkohë vijon puna nga autoritetet për të identifikuar dhe arrestuar autorin e vrasjes.
