Skerdian Gabrani, një nga të dyshuarit për ekzekutimin e 31-vjeçarit Taulant Gjikaj, është vetëdorëzuar ditën e sotme në drejtorinë e Vlorës.
Mësohet se Gabrani është fshehur në qytetin e Vlorës, teksa avokati i tij e ka shjjoqëruar për në ambientet e policisë. Taulant Gjikaj u ekzekutua më 3 mars të këtij viti pranë rrugës ”Transballkanike”.
Gjikaj u qëllua teksa po ecte në trotuar, ku breshërisë së plumbave u shpëtuan për mrekulli disa kalimtarë. Atentati dyshohet se ka ndodhur për shkak të një konflikti për rreth 20 mijë euro.
Viktima, që njihej edhe me mbiemrin Manaj dhe Beqiri, dyshohet se kishte detyrim financiar, lidhur me shitjen e një automjeti tip “Benz-Mercedez”, për të cilin refuzonte të dorëzonte pagesën.
Në vendin e ngjarjes, viktimës iu sekuestrua në brez një armë zjarri pistoletë të cilën nuk mundi ta përdorë dhe 4 aparate telefonike, që tashmë janë dërguar për ekspertim.
Kush ishte viktima?
I cilësuar si i rrezikshmi i Vlorës, Taulant Gjikaj (Manaj, Beqiri) ishte arrestuar nga policia për ngjarjen e datës 27 shkurt në Vlorë, pas një konflikti mes dy grupeve, ku kishte mbetur i plagosur vetë ai.
Pas ngjarjes dhe arrestimit, policia vendosi masën e sigurisë arrest në shtëpi për të, por edhe pse në këtë masë sigurie, Gjikaj u kap në flagrancë nga policia teksa lëvizte me një automjet me armë brenda tij.
Në gusht të vitit 2018, ai u lirua nga gjykata e faktit dhe gjyqtarja Herla Çela, e cila konfirmoi se ishte njohur vetëm me rastin e fundit, ndërsa në dosje nuk kishte asnjë informacion se Taulant Manaj ishte person i përfshirë edhe në ngjarjen e datës 27 shkurtit.
