Një vrasje e dyfishtë e tipit mafioz tronditi qytetin e Shkodrës ditë më parë. Banorët u shokuan kur panë se ish-polici Boran Berçana dhe bashkëjetuesja e tij, Silvi Ndoci, ishin ekzekutuar në makinën e tyre, në sy të djalit të tyre vetëm 1-vjeç, i cili fatmirësisht nuk ishte lënduar.
Dhimbja ka kapluar familjarët, të cilët e kanë bërë publike dhe kanë përçuar mesazhe vajtuese në rrjetet sociale.
Motra e 24-vjeçares që humbi jetën, Antoneta Ndoci, shpreh në rrjetet sociale dhimbjen për humbjen e Silvit, si dhe për djalin e vogël që la jetim.
Vrasja e ish-policit Boran Berçana dhe bashkëjetueses së tij Silvi Ndoci, ende nuk ka autor. Pamjet e kamerave të sigurisë kanë treguar se në atentatin ndaj çiftit morën pjesë të paktën dy persona.
Ka qenë ora 01.30 minuta e së dielës, kur 30-vjeçari dhe gruaja 25-vjeçare janë qëlluar me 23 plumba brenda mjetit të tyre tip “Benz”, me një armë automatike me silenciator, prodhim gjerman M5P, ku një karikator mban 30 fishekë.
Ata u sulmuan në oborrin e pallatit ku jetonin, ndërsa në makinë bashkë me ta ishte edhe fëmija, i cili shpëtoi pa lëndime.
Autori është pritur në rrugën kryesore nga një tjetër bashkëpunëtor, që e ka ndihmuar të largohet nga vendi i ngjarjes.
Disa kilometra më tutje, në by pass-in e qytetit, duke shfrytëzuar errësirën, kanë djegur makinën tip “Benz” dhe armën e krimit, dhe janë larguar në drejtim të paditur.
Numri i shasisë së mjetit pritet të ndihmojë në gjetjen e poseduesit të saj, thonë ekspertët e policisë.
