Një nga ekspertët më në zë kinezë mbi koronavirusin, ka vënë në dyshim aftësitë e qeverisë amerikane, për të luftuar pandeminë. Kjo pasi situata nga pandemia po ecën me ritme të frikshme në SHBA. Numri i viktimave dhe të prekurve me koronavirus sa vjen dhe rritet.
Epidemiologu Zhong Nanshan, tha se është i shqetësuar rreth asaj që mund të ndodhë në SHBA, duke shtuar se “problemi i Amerikës do të kthehet në problem të gjithë botës”.
Nëse virusi vazhdon të përhapet me të njëjtat ritme, ai paralajmëroi për pasoja të rënda në të gjithë botën. Po kështu apeloi ndaj autoriteteve amerikane që të shtrëngojnë më tej masat e karantinës.
“Jam i shqetësuar për faktin se në disa vende të huaja, virusi po përhapet shumë shpejt. Ka rreth 10 000 raste në ditë, dhe ky është problem i madh. Sepse krijon një peshë të papërballueshme për sistemin shëndetësor, dhe çon në një rreth vicioz në vendet që po përpiqen të kontrollojnë krizën.
Sidomos në vendet e mëdha, nëse nuk kontrollohet menjëherë përhapja, ka pasoja shkatërrimtare për të gjithë botën pastaj. Asnjë vend nuk do të jetë i sigurt më pas. Kjo gjë më shqetëson më shumë”.
