Prokuroria ka dorëzuar sot në Komisionin Qendror të Zgjedhjeve, kërkesën për heqjen e mandatit të deputetit të Partisë Socialiste, Vladimir Kosta, i cili nuk ka deklaruar dënimin për armëmbajtje pa leje para disa vitesh.
Sipas burimeve nga Prokuroria e Përgjithshme për Tirana Today, mësohet se hetimet e Prokurorisë nuk do të ndalen me kaq.
Këto burime kanë bërë me dije se përveç deputetit Kosta janë edhe emrat e 3 deputetëve të tjerë, shenjat e gishtave të të cilëve i janë dërguar Interpolit.
Aqif Rakipi, Mhill Fufi dhe Artan Gaçi janë emrat e deputetëve të cilët po “skanohen” nga Interpoli.
Pritet që pas kryerjes së procedurave përkatëse, Interpoli t’i dërgojë përfundimet organit të akuzës.
Deputetë nën hetim:
Artan Gaçi – PS, i dënuar për kundërvajtje penale, me gjobë 300 mijë lekë, i shpallur i pafajshëm në vitin 2009.
Mhill Fufi – I pavarur. Ka deklaruar në formularin e vetëdeklarimit dhe e paregjistruar në vërtetimin e gjendjes gjyqësore se: Është akuzuar, ndaluar me arrest në vitin 2001, për favorizim prostitucioni dhe me vendim gjykate ka pushuar procedimi. Është akuzuar në vitin 1998 për organizim dhe pjesëmarrje në tubim të paligjshëm dhe me vendim gjykate është pushuar procedimi.
Aqif Rakipi – PDIU. Ka dorëzuar të pastër deklaratën, ndërsa ka shkruar vetëm se ka qenë në Itali nga viti 1993 deri më 1999. Nga ana tjetër, sipas akuzave të opozitës thuhet se ka dënim për trafik droge dhe qeniesh njerëzore për prostitucion në Itali dhe Zvicër.
Tirana Today/Orest Çipa
