Protesta e opozitës së bashkuar para Parlamentit është shoqëruar me incidente të shumta. Kulmi arriti kur protestuesit u përplasën me policinë dhe këta të fundit i shpërndanë ata duke hedhur gaz lotsjellës.
Deputeti i LSI, Petrit Vasili në një prononcim për gazetaren e Tirana Today, u shpreh se kjo protestë tregon se në Shqipëri nuk ka pluralizëm politik sa i takon mazhorancës. Përdorimin e gazit lotsjellës ai e cilëson si një vepër kriminale nga policia, pasi ajo është e ndaluar edhe nga Parlamenti Europian.
Vasili tha se gazi lotsjellës është një lëndë luftarake që edhe kundër armiqve kufizohet. Me këto veprime qeveria ka kaluar kufirin e durimit të protestuesve dhe opozitës.
“Sot nuk po zhvillohet parlament. Kjo protestë do të thotë që Shqipëria nuk ka një parlament pluralist, nuk ka pluralizëm politik sa i takon mazhorancës. Kanë varrosur atë që është baza e një sistemi që është të ketë një pluralizëm politik, që të ketë raporte mes mazhorancës dhe opozitës. Dhe njëkohësisht me të gjithë qëndrimin e sjelljen kanë kriminalizuar në ekstrem vjedhjen e vendit dhe politikën e jetës shoqërore. Kanë vënë qartazi popullin përballë qeverisjes së vendit, pra një qeverie e izoluar përballë popullit që nuk e beson.
Policia bëri sjellje kriminale, pasi ka përdorur lëndë të njohura botërisht, si lëndë tymuese luftarake të nivelit të parë. Të cilat kanë rrezik të lartë dhe përdoren për armiq në luftëra edhe aty kufizohen. Rezoluta e Këshillit të Europës ishte shumë qartë për përdorimin e këtyre në Francë, imagjinoni sa me qetësi i përdorin këtë. Unë nuk jam njeri i policisë, por lexoj atë që thotë Parlamentit Europian, i cili thotë se nuk duhet përdorur. Pasi demokracia nuk vendoset me lëndë kimike. Ndodhi sot dhe zgjidhi një hall të Ramës, por i presin ditë të gjata dhe shumë të vështira, kështu do i zgjidhin?
Në qoftë se ne do t’iu themi popullit që është me mijëra dhe ata rreth 100, të hidhet në ‘veprim’ e kuptoni ca do ndodhte. Mesazhi nuk ka qenë gjithmonë që është protestë paqësore, mund të ketë reagime, por pa i kaluar kufijtë e durimit. Por sot i kaluan kufijtë e durimit, pasi ata po helmojnë njerëzit në masë. Dhe kjo vetëm që Edi Rama të rrijë edhe dy vite në pushtet,” u shpreh Vasili. TIRANA TODAY
