Instituti i Statistikave ka publikuar raportin “Produkti i Brendshëm Bruto” për tremujorin e dytë të 2017-ës.
Sipas këtyre të dhënave, ekonomia u rrit me 4.06% kundrejt tremujorit të dytë të vitit 2016, ku kontribuues kryesor është dega e ndërtimit me +1.84 pikë përqindje.
Ndërkohë, kontribuues të tjerë për rritjen e PBB-së janë degë si, Industria, Energjia dhe Uji me +0,69 pikë përqindje, Tregti Hotele dhe Restorante dhe Transporti me +0,52 pikë përqindje, Administrata publike, Arsimi dhe Shëndetësia me +0,43 pikë përqindje, Aktivitete Financiare dhe te Sigurimit me +0,27 pikë përqindje, Bujqësia, Pyjet dhe Peshkimi me +0,16 pikë përqindje, Informacioni dhe Komunikacioni me +0,05 pikë përqindje, Pasuritë e paluajtshme me +0,05 pikë përqindje.
Nga ana tjetër, aktivitete si Shërbimet e tjera dhe Aktivitete profesionale dhe Shërbime administrative kanë ndikuar negativisht, përkatësisht me -0,11 pikë përqindje dhe -0,13 pikë përqindje.
Taksat Neto mbi produktet kontribuuan pozitivisht me +0,29 pikë përqindje.
Degët kryesore të ekonomisë për tremujorin e dytë të vitit 2017 krahasuar me tremujorin e dytë të vitit 2016 shfaqen si më poshtë:
Aktiviteti i Bujqësisë, Pyjeve dhe Peshkimit pati një rritje me 0,13 %.
Aktiviteti i Industrisë, Energjisë dhe Ujit pati rritje me 6,05 %. Ndikimin kryesor në këtë rritje e kanë dhënë Industria Nxjerrëse, e cila ka ndryshuar trendin duke shënuar rritje me 16,93 % dhe Industria Përpunuese, e cila pati rritje me 6,30 %, ndërsa grupi Energji Elektrike pati rënie me 2,21 %.
Aktiviteti i Ndërtimit pati rritje me 22,68 %, influencuar kryesisht nga investimet private të lidhura me TAP, si edhe nga kompanitë që bëjnë vepra publike si rrugë, stadiume etj.
Grupi i aktiviteteve Tregti, Hotele, Restorante dhe Transport pati një rritje prej 3,54 %, i ndikuar kryesisht nga tregtia me shumicë dhe transporti tokësor dhe ujor.
Grupi i aktiviteteve Informacioni dhe Komunikacioni u shfaq me rritje prej 2,04 %. Aktiviteti Financiar dhe i Sigurimit ka shënuar një rritje prej 10,60 %.
Aktiviteti i Pasurive të Paluajtshme ka shënuar një rritje prej 0,93 %.
Grupi i Aktiviteteve profesionale dhe Shërbime administrative u shfaq me një rënie prej 2,31 % i ndikuar kryesisht nga rënia në aktivitetin e Call Center.
Grupi i aktiviteteve të Administratës Publike, Arsimit dhe Shëndetësisë pati rritje me 4,27 %, i ndikuar kryesisht nga shëndetësia, ndërkohë që arsimi shfaqet me rënie të lehtë.
Grupi i aktiviteteve Shërbime të tjera si Arte dhe argëtim, Aktivitete të tjera shërbimi, Aktivitete të familjes, Aktivitete të familjes për përdorim të vet, Aktivitete të organizatave ndërkombëtar, pati rënie me 4,57 %.
Taksat Neto mbi produktet patën rritje me 2,20 %.
Sa i përket ndryshimeve në krahasim me tremujorin paraardhës, treguesi i Produktit të Brendshëm Bruto vlerësohet me një rritje prej 0,36 %.
Aktiviteti Bujqësisë, Pyjeve dhe Peshkimit u ul me 1,10 %.
Aktiviteti i Industrisë, Energjisë dhe Ujit u rrit me 1,33 %. Aktiviteti i Ndërtimit shënoi rritje me 6,45 %.
Aktiviteti Tregti, Hotele, Restorante dhe Transport pati një rritje prej 1,37 %.
Aktiviteti Informacioni dhe Komunikacioni u shfaq me një rritje prej 1,24 %.
Aktiviteti Financiar dhe i Sigurimit pati një rënie prej 2,77 %.
Aktiviteti i Pasurive të Paluajtshme pati një rritje prej 1,99 %.
Aktiviteti Aktivitete profesionale dhe Shërbime administrative u shfaq me një rënie prej 2,25 %.
Aktiviteti i Administratës Publike, Arsimit dhe Shëndetësisë u shfaq me një rritje prej 0,43 %.
Aktiviteti Shërbime të tjera si Arte dhe argëtim, Aktivitete të tjera shërbimi, Aktivitete të familjes, Aktivitete të familjes për përdorim të vet, Aktivitete të organizatave ndërkombëtar, u shfaq me një rritje prej 3,67 %.
Taksat Neto mbi produktet patën rënie me 1,72 %.
