Shpenzimet për arsimin në buxhetin e familjeve shqiptare zë një peshë shumë të madhe, madje ka ardhur duke u rritur në vitet e fundit. Kjo vjen si rezultat i rritjes së tarifave në arsimin publik.
Sipas të dhënave, shpenzimet mujore të një familje 4.4 për qind shkojnë për arsim. Ky është niveli më i lartë në Evropë në raport me shpenzimet e tjera.
Bazuar në shifrat e INSTAT, shpenzimet për arsimin më shumë se 8 për qind shkojnë për nivelin e dytë të studimeve të arsimit të lartë.Gjithashtu statistikat flasin se dy të tretat e shpenzimeve për arsimin shkojnë për masterat e nivelit të parë dhe të dytë shkojnë në arsimin publik dhe privat.
“Në vitin 2014-2015 qeveria shqiptare me një vendim të posaçëm rriti tarifat në studimet master me rreth 20 për qind në të gjitha universitet publike. Kjo rritje preku ndjeshëm shpenzimet për arsim të familjeve për shkak se, 90 për qind e studentëve frekuentojnë universitet publike”-shkruan Monitor.al.
Në vitin shkollor 2016-2017 ndoqën studimet e larta 139,607 të rinj nga të cilët rreth 115 mijë zgjodhën universitetet publike.Sipas të dhënave zyrtare nga Universiteti i Tiranës për një master profesional tarifa shkon në mbi 90 mijë lekë ndërsa për një master shkencor mbi 105 mijë lekë.
Shpenzimet për arsim, të cilat zënë 4,4 % të buxhetit të familjeve gjithsej kanë pësuar rritje prej 2,3 pikë përqindje krahasuar me 2015. Pesha e shpenzimeve për arsimin shënoi rekord më 2016 ne krahasim me 1.7% që ishte një dekadë më parë.INSTAT klasifikoi si shpenzime për arsim pagesat që familjet bëjnë gjatë një muaji arsimin parashkollor dhe fillor, arsimin 8/9 vjeçar dhe të mesëm, arsimin parauniversitar, arsimin e lartë dhe kurset.
Të dhënat krahasuese nga anketat e buxhetit të familjeve të vendeve të rajonit dhe Eurostat, të përpunuara nga Monitor, tregojnë se familjet shqiptare kanë peshën më të lartë të shpenzimeve për arsim nga vendet e rajonit dhe ato të Bashkimit Europian. Mesatarja e Bashkimit Europian është 2.1%, ndërsa një familjeje në rajon i kushton shumë më pak (në termin relativ ndaj shpenzimeve totale) që të shkollojë fëmijën. Serbia, Maqedonia, Bosnjë Hercegovina e kanë këtë raport midis 0.6-0.7%, ndërsa në Kroaci arrin në 1.1%. Instituti i Statistikave të Kosovës raporton në anketën e fundit të buxhetit të familjeve për vitin 2016, se pesha e shpenzimeve për arsim në totalin e buxhetit është zero.
