Qendërmbrojtësi i kombëtares shqiptare, Mërgim Mavraj është një lojtar i lirë dhe për të kanë shfaqur interes shumë ekipe. Pas një viti aspak të mirë tek Hamburg, i cili ra edhe nga Bundesliga, Mavraj shkëputi kontratën me ata dhe mori një dëmshpërblim të majmë.
Ndërsa tani shumë klube gjermane dhe nga Italia kanë kontaktuar mbrojtësin për të siguruar shërbimet e tij, por vetë Mavraj në një komunikim për mediat shqiptare konfirmoi se ai është në bisedime edhe me një klub grek. Është skuadra e Aris ajo që kërkon me çdo kusht shërbimet e mbrojtësin në skuadër.
Sipas “Gazzeta.gr”, tratativat mes dy palëve kanë nisur dhe Mavraj ka marrë një ofertë të parë, që mësohet se është refuzuar. Shkak për këtë refuzim është rroga e ulët që shqiptarit i është ofruar, por bisedimet vazhdojnë dhe shumë shpejt mund të arrihet akordi.
Këtë gjë e pranuan dhe persona brenda klubit grek, që thanë se akordi me Mërgim Mavrajn është shumë pranë. Te skuadra e Aris, Mavraj do të bashkohej me shqiptarin tjetër, Migjen Basha.
