Edhe pse Prokuroria e Tiranës nisi hetimet për ilaçet e skaduara gjatë periudhës 2012-2018, efektiviteti i medikamenteve për qytetarët shqiptarë vijon të mbetet ende shqetësues.
Ata shprehen për “Ora News” se nuk bëjnë efekt dhe “kot që i blejmë”.
Disa prej tyre tregojnë edhe rastet kur për shkak të cilësisë së barnave kanë pasur probleme shëndetësore.
“Të gjitha të skaduara janë këtu, e kam gruan me tiroide, ilaçet që ja kanë dhënë deri para një muaji nuk i kanë bërë asnjë lloj efekti”, thotë një qytetar.
” Vij nga Fieri, shiko si jam bërë. Më kanë bërë alergji ilaçet, nuk më kanë dhënë ilaçet e duhura. Kam ardhur këtu urgjent. Gjithë këtë behar që kurohem. Po të ishin ilaçet e mira unë nuk do të vija këtu në këtë gjendje”, shprehet një qytetare tjetër.
Agjencia e Kontrollit të Barnave, institucioni përgjegjës për cilësinë e tyre, nuk ka të dhëna të reja lidhur me cilësinë e tregtimit të medikamenteve nëpër farmaci, ndërsa bën me dije se Task-Forca do të publikojë të dhëna të reja në lidhje me ilaçet që shiten në farmacitë e vendit.
