Dy efektivë të policisë rrugore të Durrësit janë goditur mbrëmjen e djeshme nga një makinë, e cila ecte në sens të kundërt në rrugë. Mjetit të drejtuar nga Hysen Pici i është bërë me shenjë që të ndalojë, por ajo ka vijuar rrugën dhe ka goditur efektivët, njeri prej te cileve ndodhet në spital për ndihmë mjekësore, jashtë rrezikut për jetën.
Hysen Pici udhëtonte në sens të kundërt në lagjen nr.1 në Durrës, teksa policia i bëri shenjë që të ndalonte. Ai vijoi lëvizjen me shpejtësi duke përplasur dy efektivë policie. Menjëherë pas ngjarjes, ai doli nga automjeti dhe tentoi të ikte me vrap. Pas pak minutash, policia bëri të mundur arrestimin e tij. Gjatë kontrollit, Picit iu gjet dhe një armë zjarri tip pistoletë.
Durrës/Informacion paraprak
Më datë 09.06.2022, rreth orës 22.40, në lagjen nr 1, Durrës, një automjet me drejtues shtetasin H.P, lëviste në sens të kundërt.
Forcat operacionale të DVP Durrës që ishin me shërbim në këtë zonë i kanë bëre shenjë për të ndaluar por drejtuesi i automjetit ka vijuar lëvizjen me shpejtësi duke përplasur punonjësit e policisë.
Si pasojë njëri prej punonjësve të policisë, shtetasi G.M, është dëmtuar dhe ndodhet në spital për ndihmë mjeksore, jashtë rrezikut për jetën.
Forcat operacionale të DVP Durrës janë vënë në ndjekje ku kanë bërë të mundur kapjen e personit që ndodhej në mjet, konkretisht shtetasin H.P, i cili kishte me vete armë zjarri pistoletë.
Grupi hetimor në bashkëpunim me AMP, nën drejtimin e Prokurorisë vijon punën për sqarimin e plotë të rrethanave dhe dokumentimin ligjor të kësaj ngjarjeje.
