Si çdo ditë, “Tirana Today” vjen me edicionin informativ. Në të do të gjeni zhvillimet e ditës nga vendi, rajoni e bota.
27 të arrestuar nga 4 grupe kriminale, 3 efektivë të implikuar
Policia e Shtetit ka dhënë detaje lidhur me operacionet e ditëve të fundit, të ndërmarrë në 12 rrethe të vendit. Gjatë këtij mega operacioni janë arrestuar 27 shtetas, dhe 6 janë shpallur në kërkim. Gjithashtu u godit një laborator i përpunimit të heroinës në fshatin Brenog në Has. Ndër të tjera janë sekuestruar 182.5 kg morfinë, e ndarë në 175 pako, 22 litra lëndë e lëngshme, të cilat përdoreshin për prodhimin e heroinës.
Ndihmonin grupet kriminale/Pranga 3 punonjësve të policisë
Në super-aksionin e ditëve të fundit, në pranga kanë përfunduar edhe tre punonjës policie. Ata akuzohen për veprat penale “Shpërdorim detyre”, “Ndihmë për kalimin e paligjshëm të kufijve”, në kuadër të grupit të strukturuar kriminal dhe organizatës kriminale. Ata janë:
- Ardit Gjyriqi, nga Tirana;
- Jasin Abdul, nga Saranda;
- Bledar Koçi, nga Lushnja.
Prela paralajmëron: Do ketë goditje të tjera
Drejtuesja e Prokurorisë së Krimeve të Rënda, Donika Prela, ka paralajmëruar se së shpejti do të ketë goditje të tjera të veprimtarisë së korrupsionit në instituticionet shtetërore. Gjatë një deklarate për mediat, ajo tha se nga hetimet ka rezultuar se ka të dhëna për veprimtari të kundraligjshme.
