Ndonëse presidenti Meta ka shfuqizuar 30 qershorin për mbajtjen e zgjedhjeve, kryeministri Edi Rama vijon me agjendën e tij, duke mos u lëkundur për asnjë çast të vetëm. Ndërsa PS miratoi dje me 100 vota pro rezolutën kundër Metës, dhe kanë nisur procedurat për shkarkimin e tij, kryeministri ka një përshëndetje këtë mëngjes për të gjithë ndjekësit në rrjetet sociale.
Rama ka publikuar një filxhan kafeje, ndërsa është shkruar mbi të numri 30. Krahas fotos, kreu i qeverisë ka vendosur një emoji, duke qeshur.
Dje, nga Përrenjasi ai iu përgjigj Presidentit Ilir Meta, lidhur me njoftimin e Presidencës se do të ketë një datë të re për zgjedhjet lokale. Rama tha se u njoftua për reagimin që kishin bërë dy përfaqësuesit e Ilir Metës, ndërsa theksoi edhe një herë se zgjedhjet do të mbahen më 30 qershor, ndërsa i ka bërë thirrje Presidentit që të reflektojë pas votimit të rezolutës në Kuvend, me 100 vota.
Nga ana tjetër, Ilir Meta nuk e njeh rezolutën që u votua në Parlament, për rrëzimin e dekretit për shtyrjen e zgjedhjeve. Bledar Dervishaj, Këshilltari Ligjor i Presidentit, deklaroi gjatë një konference për mediat, se vetëm Gjykata Kushtetuese mund të rrëzojë një dekret presidencial dhe jo Parlamenti. Në këto kushte tha ai, Presidenti i Republikës fton Parlamentin dhe partitë politike të reflektojnë, sepse dekreti për të shtyrë zgjedhjet është i pakthyeshëm.
