Kandidati i parë zyrtar për kreun e ri të Partisë Demokratike, Eduard Selami, kërkoi sot shtyrjen e zgjedhjeve në parti, me pretendimin se nuk ka kohë të mjaftueshme për bërjen e fushatës.
Gjatë një komunikimi me gazetarët në përfundim të një takimi me kandidatin tjetër, Lulzim Basha, ai tha se i kishte kërkuar këtij të fundit shtyrjen e zgjedhjeve deri në javën e parë të shtatorit. Por, siç u shpreh Selami, Basha i është përgjigjur se kjo është kompetencë e grupit organizativ të zgjedhjeve.
“Është garë vizionesh brenda familjes. Ka kohë që e kam thënë që ky model drejtimi është i kapërcyer. PD ka nevojë dhe e ka për detyrë të prezantojë një lidership vizionar e demokratik, që Basha nuk e ka”, shtoi ai.
Selami përsëriti se, po të ishte ne vendin e Bashës do të kishte dhënë dorëheqje të parevokueshme nga drejtimi i partisë.
