Në një konferencë për mediat nga selia blu, kryedemokrati Basha ka përshëndetur aksionet e fundit të SPAK, që kanë çuar në arrestimin e ish-ministrit Lefter Koka. Basha tha se Lefter Koka nuk është thjesht “kokë turku”, por ai nuk mund të bënte 17 vendime qeverie brenda ditës. Ndër të tjera, kreu i PD-së shtoi se korrupsioni duhet të goditet në nivele të larta. Kreu i PD-së nënvizoi se ka kërkuar Vettingun e politikanëve, për t’ia bërë më të lehtë SPAK-ut punën e tij, pasi përmes Vettingut politikanët dalin haptas si hajdutë dhe përvetësues fondesh publike.
“Ditën e djeshme SPAK-u ka arrestuar Lefter Kokën, dhe disa bashkëpunëtorë në aferën e inceneratorëve, sikundër ka shpallur në kërkim edhe disa të tjerë. Sot dua t’ju drejtohem të gjithë qytetarëve shqiptarë me 4 mesazhe të qarta, të cilat i kemi komunikuar gjatë këtyre kohëve, nisur nga aferat korruptive. Por më e madhja e mafies së inceneratorëve.
Mesazhi i parë është që për PD, lufta kundër korrupsionit është jetike, vendimtare për Shqipërinë, për shtetin ligjor, të drejtat e njeriut dhe mirëqenien e shqiptarëve. Problemi numër një është problemi i mirëqenies.
Problemi numër një i keqqeverisjes është korrupsioni. Shqipëria nuk është e varfër, por është e vjedhur. Ja ku duket sot fare qartë se si taksat që kanë marrë nga qytetarët, i kanë vjedhur në bashkëpunim me njëri-tjetrin politikanët.
Një skemë e ndërtuar nga persona të krimit të organizuar, në bashkëpunim me oligarkinë. Pasi kanë vjedhur ditën për diell paratë, me këto para kanë paguar edhe për të heshtur. Nuk na i kanë mbyllur dot gojën ne.
U jemi drejtuar me thirrje dhe me hapa ligjorë SPAK-ut. Njësoj si është i rëndësishëm dekriminalizmi, njësoj është e rëndësishme lufta kundër korrupsionit. Pa rezultate konkrete asgjë nuk mund të ndryshojë.
Ndaj për PD-në dhe për mua si kryetar i saj, misioni nr. 1 është lufta kundër korrupsionit dhe krimit. Kur SHBA-të e shpallin luftën kundër korrupsionit mision kombëtar, me demokracinë e tyre të zhvilluar shpallin e korrupsionin, cënon interesat kombëtare, po ne këtu? Ku një grusht njerëzish kanë grabitur dhe gllabëruar çdo gjë. Ministra të qeverisë pastrojnë para dhe grabisin prona publike. Vettingu i politikanëve është vetëm një mjet për të luftuar korrupsionin dhe krimit. Pse e kemi kërkuar Vettingun e politikanëve? Për t’ia bërë më të lehtë SPAK-un, të bëjë punën e tij. Sepse politikanët që kanë vjedhur, përmes Vettingut dalin haptas si hajdutë dhe përvetësues të fondeve publike”, tha Basha.
“Goditja të jetë e vërtetë, të mos mjaftohet me ‘koka turku’. Natyrisht Lefter Koka nuk është thjesht një ‘kokë turku’ se ishte ministër. Por siç e thashë dje, nuk mund t’i bënte i vetëm. Edhe ish-qeverisja e PD-së ka pasur korrupsion. Jemi të vendosur ta luftojmë edhe atë. Nuk mund të ketë ndryshim për shqiptarët. E di që shpesh kjo retorikë është bërë bajate. Sa herë kemi dalë ne denoncime, edhe qytetarët kanë folur për korrupsionin e qeverisjes sonë. Por ne jemi të vendosur të ecim përpara, të shkëputemi nga e kaluara jonë e keqe, dhe te zgjedhim të ardhmen që vetëm ne mund ta sjellim për shqiptarët!”, deklaroi Basha.
