Uniformat blu kanë vënë në pranga dy shtetas, në lidhje me rastin kur u aksidentuan gjatë punës dy punëtorë, njëri prej të cilëve gjeti vdekjen. Burimet zyrtare bëjnë me dije se referuar ngjarjes ssë ndodhur një ditë më parë, ku në një pallat në ndërtim, gjatë punës u aksidentuan dy punëtorë, janë arrestuar në flagrancë dy persona. Ata janë F.P., 67 vjeç, banues në Korçë (me detyrë përgjegjës teknik i firmës së ndërtimit) dhe A.Z., 41 vjeç (me detyrë manovrator).
Njoftimi i policisë
Policia arreston në flagrancë për veprën penale “Shkelja e rregullave të mbrojtjes në punë”, përgjegjësin teknik dhe manovratorin e firmës së ndërtimit, që kryente punime në pallatin në të cilin u aksidentuan gjatë punës dy punëtorë, njëri prej të cilëve gjeti vdekjen.
Në vijim të veprimeve hetimore të kryera për sqarimin e rrethanave të ngjarjes së ndodhur më datë 03.01.2020, ku në lagjen nr.9, në një pallat në ndërtim, gjatë punës u aksidentuan dy punëtorë njëri prej të cilëve për pasojë gjeti vdekjen, ndërsa tjetri ndodhet në Spital jashtë rrezikut për jetën, sqarojmë se specialistët për Hetimin e Krimeve në Komisariatin e Policisë Korçë, bënë arrestimin në flagrancë të shtetasve:
- F.P., 67 vjeç, banues në Korçë (me detyrë përgjegjës teknik i firmës së ndërtimit).
- A.Z., 41 vjeç (me detyrë manovrator).
Këta shtetas dyshohet se kanë konsumuar elementë të veprës penale “Shkelja e rregullave të mbrojtjes në punë”, pasi gjatë procesit të hedhjes së betonit në objekt, është dëmtuar një segment metalik i presës, i cili ka goditur në kokë duke i shkaktuar vdekjen shtetasit E.J., 36 vjeç, si dhe ka dëmtuar jashtë rrezikut për jetën shtetasin P.F., 59 vjeç, të dy banues në Korçë.
Materialet i kaluan Prokurorisë pranë Gjykatës së Shkallës së Parë Korçë për veprime të mëtejshme.
Ngjarja e rëndë ndodhi në Korçë, në një kantier ndërtimi në afërsi të Pazarit të Vjetër, ku humbi jetèn punëtori E. Josifi, rreth 35-vjeç. Mësohet se punëtori ishte duke punuar në katin e katërt të pallatit, në momentin që i ra vinçi mbi kokë. Ai humbi jetën nga plagët e marra.
