Krimi i rëndë brenda familjes i mori jetën mbrëmjen e djeshme Sabrina Bengës. Ish-bashkëshorti i saj, Elton Metaj, kishte shkuar për tu sqaruar me Bengën, në banesën e prindërve të viktimës. Burimet thonë se ai i kishte kërkuar vazhdimisht gjatë ditëve të fundit që të riktheheshin bashkë, por e ndjera nuk pranonte. Për fat të keq, debati verbal me ish-gruan ka degjeneruar në fyerje, e më pas në përdorimin e armës së zjarrit.
Vëllai i viktimës: Motra po hante bukë kur u qëllua për vdekje
Armando Bengaj, vëllai i viktimës tregoi për mediat se motra e tij po hante bukë në momentin që është qëlluar për vdekje nga autori.
Armando thotë Eltoni kishte kërcënuar edhe vetë atë për ta vrarë, ndërsa fajëson gjykatësit dhe prokurorët që e kanë nxjerrë nga burgu.
“Fajin e kanë gjykatësit e prokurorët që nxjerrin njerëz të tillë kriminelë, që sot bëri hatanë e madhe”, u shpreh vëllai i viktimës i tronditur nga ngjarja.
“Mamaja kishte dëgjuar derën. Në 20 korrik u lirua nga burgu. Fajin e kanë gjykatësit dhe prokurorët e korruptuar që nxjerrin të tillë njerëz kriminelë, që sot bëri hatanë e madhe. Mua me tha nusja për ngjarjen. Madje me kishte kërkuar dhe mua për të vrarë. Ai ishte një frikacak që të vriste pas krahëve, trimi del përballë. Ishte mamaja në momentin e ngjarjes. Motrën e vrau kur po hante bukë, sa u kthye nga puna. Motra ndërroi jetë në vend, plumbi e kishte kapur në mushkëri”, u shpreh vëllai i viktimës.
Dyshimet për tradhti dhe divorci
Konfliktet e vazhdueshme, dyshimet e ish-bashkëshortes se e tradhtonte ndaj dhe kishte hapur proceset e divorcit, apo fakti që nuk e linte të takonte të bijën, e çuan Elton Metajn në derën e shtëpisë së vjehrrit të tij.
Autori në arrati
Policia e Fierit ka blinduar zonën, për të bërë të mundur kapjen e 31-vjeçarit i cili ndodhet në arrati. /Tirana Today