Gjykata e Tiranës ka dënuar Faik e Shkëlzen Bucin, babë e bir, të cilët vranë Eglantina Bucin, me nga 25 vite burg secili. Vrasja e Eglantina Bucit, sipas Prokurorisë, u urdhërua nga babai i saj Faiku, ndërsa i vëllai Shkëlzeni e ekzekutoi. Shkëlzen Buci është dënuar me 25 vite për vrasjen e motrës së tij Eglantinës, po kështu edhe babai i tij Faik Buci me 25 vite për vrasjen e vajzës.
Ata akuzohen për “vrasje me paramendim, të kryer në bashkëpunim”, dhe “armëmbajtje pa leje”.
Si u zbulua krimi makabër
Eshtrat e Eglantinës u gjetën nga një gjuetar në datën 13 shtator 2012, por sipas ekspertëve, vrasja kishte ndodhur gati 6 muaj para. Policia është kthyer në vendin e krimit më 21 shtator 2012, ku janë gjetur një pjesë të eshtrave të Eglantinës. Një pjesë e rrobave të Eglantinës ishte e djegur. Hetimet vijuan për më se 6 muaj, për t’u mbyllur më pas në 25 janar 2013. Por dëshmia e dëshmitarit kyç me inicialet M.T, i cili ka treguar se Shkëlzen Buci, vëllai i saj, që ishte në burg për një tjetër çështje, kishte vrarë motrën e tij. Kjo dëshmi bëri që të rihapeshin hetimet në 2018, për të çuar më pas në zbardhjen e plotë të ngjarjes.
Si ndodhi vrasja
Shkëlzeni ka thirrur motrën e tij për kafe, teksa ishte i shoqëruar me shokun e tij. Në momentin që nuk po shkonin për kafe, por rrugës për te Mali me Gropa, motra, Eglantina e ka kuptuar se diçka nuk po shkonte. Aty Shkëlzeni ka nxjerrë pistoletën dhe e ka qëlluar me një plumb në nofullën e majtë duke e lënë të vdekur në vend. E gjithë skena është parë nga shoku, i cili ka ndërhyrë duke i thënë “më vrit dhe mua”, por që Shkëlzeni nuk e ka bërë. Ka qenë dëshmia e këtij, që ka shërbyer më pas për zbardhjen e këtij krimi, edhe pse 10 vite më pas. Nisur nga kjo, shoku ka marrë statusin e dëshmitarit të mbrojtur.
