Masakroi gruan me sëpatë, pasi pretendonte se e tradhtonte. Madje në dëshminë e tij, bashkëshorti vrasës shkonte deri aty sa tha se kishte dalë për të pirë kafe, dhe në momentin kur është futur në banesë, i dashuri i saj ka dalë nga dritarja. Por kjo ngjarje pëson një ndryshim rrënjësor, pasi i akuzuari ka mohuar në mënyrë kategorike, duke thënë se me këtë familje kishte marrëdhënie mjaft të mira, pasi ishin fqinj me njëri-tjetrin.
Para hetuesve ka dhënë shpjegime personi me të cilin Skënder Hoxha ka pretenduar se bashkëshortja e tij e tradhtonte. Shtetasi me inicialet S.H., mohon një fakt të tillë, ndërsa shton se në dijeninë e tij, ata shkonin shumë mirë.
“Është pyetur si person që tregon rrethanat e hetimit në lidhje me ngjarjen shtetasi S.H., i cili sqaroi se nuk ka pasur asnjë lloj marrëdhënie intime me shtetasen Antoneta Hoxha.
Me familjen e shtetasit Skënder Hoxha, dhe me bashkëshorten e tij Antonetën, ka pasur thjesht marrëdhënie familjare, hyrje-dalje te njëri-tjetri për shkak se janë bashkëfshatarë.
Më datë 30.04.2019, rreth orës 06:00, ka qenë në gjumë dhe në këtë kohë ka dëgjuar të bërtitura grash që vinin nga shtëpia e Skënder Hoxhës. Është ngritur dhe ka shkuar te shtëpia e Skënderit, ku ka mësuar se Antoneta, bashkëshortja e Skënderit, kishte vdekur.
Më pas, aty ka mësuar se Skënderi e kishte vrarë Antonetën me sëpatë. Shtetasi S.H., nuk di që ata kanë pasur ndonjë konflikt me njëri-tjetrin, pasi në dijeninë e tij, ata shkonin mirë me njëri-tjetrin”, ka thënë dëshmitari.
