Një proces divorci përfundoi sot me një vrasje në mes të Tiranës. Masakra ndodhi gjatë mesditës, ku vjehrri ekzekutoi me 5 plumba ish-dhëndrin para gjyqit. Autori ka thënë se vrasja ndodhi për të ruajtur dinjitetin e vajzës. Mexhit Picari, 53-vjeç ka vrarë në mes të lokalit ish-bashkëshortin e vajzës, i cili ishte në proces divorci, Kudret Saliaj 41-vjeç. Krimi i rëndë ndodhi pak minuta para seancës së 5-të.
I plagosur jashtë rrezikut për jetën mbeti dhe avokati i viktimës, Adriatik Cama. Kudret Saliaj është qëlluar me 8 plumba nga vjehrri, ndërsa në trup e kanë kapur 5 plumba. Viktima në momentin që është vrarë nga ish-vjehrri, ndodhej pranë gjykatës duke konsumuar një kafe me avokatin e tij në këtë proces divorci, Adriatik Camaj i cili po ashtu ka mbetur i plagosur. Autori ka qenë bashkë me vajzën Dhurata Saliaj në të njëjtin lokal me viktimën, disa karrige me tej. Pasi ka kryer vrasjen, autori është larguar me këmbë mes pallatesh, dhe më pas është arrestuar tek shtëpia e vajzës së tij në Yzberisht.
“E vrava për dinjitetin e vajzës”
Në dëshminë e tij në polici, Mexhit Picari tha se e ka bërë vrasjen për dinjitetin e vajzës, duke thënë se e kanë akuzuar pa të drejtë për tradhti ndaj bashkëshortit dhe dhunë fizike e psikologjike ndaj 3 fëmijëve të saj.
Dinamika e ngjarjes
Në orën 12:00, bashkëshortët Saliaj do të zhvillonin seancën e radhës të divorcit në Gjykatën e Tiranës. Në pritje të nisjes së saj, palët po pinin kafe në të njëjtin lokal në zonën e ish-Ekspozitës në kryeqytet. Ngjarja ndodhi 10 minuta para seancës gjyqësore për ndarjen e çiftit. Në momentin e ngjarjes, Mexhiti dhe Dhurata kanë qenë ulur në lokal, ndërsa në një karrige tjetër disa metra më tej ishin ulur Kudret Saliaj me avokatin e tij Adriatik Cama.
Në një moment, pa shkëmbyer asnjë fjalë, Picari është ngritur nga tavolina dhe duke nxjerrë pistoletën, ndërsa ka qëlluar 8 herë në drejtim të tij. 5 nga plumbat kanë goditur Saliajn dhe 1 tjetër avokatin e tij, Adriatik Camën. Pasi vrau Saliajn, Mexhit Picari është larguar në këmbë me shpejtësi nga vendi i ngjarjes, ndërsa pas tij u largua edhe Dhurata, ish-bashkëshortja e viktimës.
