Zbardhen detaje të reja në lidhje me ngjarjen e rëndë të ndodhur mesditen e sotme pranë Gjykatës së Lartë në kryeqytet, ku një 52-vjeçar vrau me armë zjarri ish-bashkëshortin e vajzës, dhe plagosi avokatin e tij.
Policia ka shkuar në fshatin Picar në Vorë, ku ndodhet banesa e autorit të dyshuar MExhit Picari, për të bërë një kontroll të imtësishëm, në vijim të hetimeve.
Ndërkohë, gazetarja Dorjana Bezat e ”BalkanWeb, ka folur me disa nga fqinjët e 52-vjeçarit, të cilët deklaruan se ai ndodhej në gjendje të rënduar psikologjike, për shkak të situatës që po kalonte e bija për divorcin.
Ky i fundit, i cili mbeti i vrarë sot është shprehur disa herë se “do e vriste Dhuratën”, vajzën e autorit me të cilën ishte në proces divorci dhe se “do shpëtonte prej saj vetëm kur ta vriste”.
“I kishte thënë Mexhitit do ta bëj copa-copa Dhuratën. Mexhiti ishte shumë keq, në gjendje të rëndë psikologjike prej kohësh”, kanë deklaruar fqinjët.
Si ndodhi vrasja
Në orën 12:00, bashkëshortët Saliaj do të zhvillonin seancën e radhës të divorcit në Gjykatën e Tiranës. Në pritje të nisjes së saj, palët po pinin kafe në të njëjtin lokal në zonën e ish-Ekspozitës në kryeqytet. Ngjarja ndodhi 10 minuta para seancës gjyqësore për ndarjen e çiftit. Në momentin e ngjarjes, Mexhiti dhe Dhurata kanë qenë ulur në lokal, ndërsa në një karrige tjetër disa metra më tej ishin ulur Kudret Saliaj me avokatin e tij Adriatik Cama.
Në një moment, pa shkëmbyer asnjë fjalë, Picari është ngritur nga tavolina dhe duke nxjerrë pistoletën, ndërsa ka qëlluar 8 herë në drejtim të tij. 5 nga plumbat kanë goditur Saliajn dhe 1 tjetër avokatin e tij, Adriatik Camën. Pasi vrau Saliajn, Mexhit Picari është larguar në këmbë me shpejtësi nga vendi i ngjarjes, ndërsa pas tij u largua edhe Dhurata, ish-bashkëshortja e viktimës.