Humbja ne finalen e Kupës së Italisë ka acaruar protagonistët te skuadra e Atalantës të cilët e ndjejnë veten të vjedhur për atë që ka ndodhur gjatë sfidës ndaj Lazios. Vetë trajneri Gasperini ka sulmuar ashpër gjyqtarët dhe sistemin që është ndërtuar pasi skuadrës së tij i ishte mohuar një penallti si dhe një karton i kuq kundër Bastos të Lazios i cili preku topin me dorë në zonë por VAR-i nuk ndërhyri.
“Prekja me dorë e Bastos është një episod i rëndë i paparë. Ajo është një penallti shumë e qartë dhe është edhe kartoni i dytë i verdhë, ka vendosur fitoren e Kupës së Italisë. T’ia bësh këtë Atalantës është e turpshme, i heq besueshmërinë VAR-it. Ky është një episod i shëmtuar për futbollin tonë dhe nuk mund të mos shihet. Nuk ka dyshime interpretimi në këtë moment, atëherë më mirë të heqim VAR-in. Ishte një penallti, një karton i kuq dhe një skuadër e cila duhej të luante me 10 lojtarë për më shumë se një orë në finalen e Kupës.
Ndodh sepse është Atalanta? Më jepni ju një shpjegim tjetër. Unë nuk e kisha parë, por është VAR për këtë punë. Nuk është një faull i dyshimtë, është shumë i qartë. Si mund ta mohosh? Nuk është e thënë që do të kishim shënuar penalltinë, por kartoni i kuq do të ndryshonte sfidën në minutën e 25-të. Është diçka e shëmtuar, u tallën me 21 mijë persona që kishin udhëtuar nga Bergamo.
Kjo e sotmja është një ditë e shëmtuar për futbollin, ky ishte një episod i qartë që nuk mund të mos e shohësh edhe në një aksion normal”, ishte akuza e ashpër e trajnerit të Atalantës pas finales së humbur 2-0.
Denonco ne TT