Banorët e Rinasit janë ngritur në protestë për të tretën ditë radhazi, kundër vendimit të ARRSH për të bërë aksin rrugor që lidh Tiranën me Aeroportin “Nënë Tereza” me një sens lëvizje.
Sot protestuesit kanë zgjedhur që të bllokojnë rrethrrotullim pranë aeroportit, duke paralizuar kështu lëvizjen.
Ashtu siç paralajmëruan një ditë më parë, banorët nuk kanë dërguar fëmijët në shkollë, teksa bashkë me ta janë ulur në rrugë, duke bllokuar qarkullimin e mjeteve.
Me thirrje “hapni rrugën”, ata kërkojnë që aksi të jetë i kalueshëm me dy sense, pasi në të kundërt duhet të bëjnë shumë kilometra për të kryer aktivitetet e tyre të përditshme.
Banorët janë shprehur se penalizohen nga bllokimi i aksit rrugor, pasi do të detyrohen të ndjekin një rrugë shumë më të gjatë për të kryer lëvizjet interubane. Sipas banorëve, vendimi i ARRSH ka bllokuar dhe penguar rreth 130 fëmijë që të shkojnë në shkollë.
