Tërmëti fatal që shkaktoi pasoja të shumta në vend është raportuar minuta pas minute nga çdo media prestigjoze në Evropë. Të gjithë sytë i kanë pasur nga Shqipëria.
Një nga familjet më të prekura nga tërmeti është rasti i familjes Lala. Nga familja me 9 anëtarë shpëtoi vetëm 1 person, 17 vjeçari Ramë Lala. Gjendja e tij tashmë është e stabilizuar dhe i riu është nisur drejt Italisë për një mjekim më të specializuar.
Historisë së 17 vjeçarit, që u nxor i gjallë nga rrënojat, prestigjozja “Reuters” i ka kushtuar një hapësirë të veçantë ditën e sotme.
Përveç notave melankolike dhe dhimbjes që dallohet ndër rreshta, “Reuters” ka zbuluar edhe detaje mbi mënyrën sesi i riu i ka shpëtuar ngjarjes fatale. Rama Lala është gjallë falë lavatriçes. Struktura metalike e pajisjes i ka krijuar të riut hapësirën e nevojshme për të mbrojtur kokën dhe trupin, pas shembjes së banesës 4-katëshe. Trarët e ndërtesës e kanë bërë të vështirë nxjerrjen e tij, por falë punës profesionale të forcave të shpëtimit ai është nxjerrë i gjallë.
Kujtojmë që bilanci ka qenë tragjik për gjithë vendin. Qindra banesa të dëmtuara, 50 viktima, mbi 700 të plagosur.
