Ekzekutimi i bosit shqiptar Flamur Beqiri ditën e Krishtlindjeve, u krye me një efikasitet të pamëshirshëm. 36-vjeçari ka qenë duke u kthyer nga shëtitja me gruan dhe djalin në shtëpinë e tyre e cila kushton 1.8 milion paund, në një nga rrugët ku jetojnë shumë të pasur në Battersea, në jug-perëndim të Londrës.
Masakra ndodhi rreth orës 9 të mëngjesit, në prag të Krishtlindjes, kur një person i vetëm e qëlloi për vdekje. Shqiptari mori katër plumba në trup dhe një në kokë.
Shqiptari, ndër më të kërkuarit në Suedi
Pas ekzekutimit dhe hetimeve që u kryen në këtë drejtim, doli se emigranti me origjinë shqiptare, prej më shumë se një dekadë ishte ndër më të kërkuarit në Suedi, vendi ku ai u rrit. Mes pretendimeve se ai ishte koka e një bande ndërkombëtare droge që trafikonte kanabis.
Kishte jetuar në arrati për gati dy vjet, por më pas ishte kapur nga policia suedeze. Pas një kohe të shkurtër në paraburgim dhe një truku të çuditshëm ligjor, ai u lirua nga akuzat për drogë, por u dënua për akuza më të lehta. Atij iu dha një dënim me kusht, dhe një gjobë, si dhe u la i lirë.
Konkurrenca me grupet rivale
Sipas burimeve të burgut të cituara këtë javë në shtypin suedez, Flamur Beqiri dhe bashkëpunëtorët e tij menjëherë rifilluan tregtinë e tyre kriminale fitimprurëse. Gjithsesi nuk ishte aspak e lehtë, pasi ata u përballën në luftë me grupet rivale, që kërkuan të kontrollojnë rrugët e kokainës dhe kanabisit nga Maroku, përmes Spanjës, në qytetin e Beqirit, në Malmo. Ndërsa tensionet mes bandave rriteshin, një nga miqtë e tij u vra.
Motra e tij, me influencë në mediat sociale
Njëra nga dy motrat e tij është Misse Beqiri, modele e veshjeve te brendshme. Prej saj i ndjeri njohu bashkëshorten e tij Debora. Po kështu edhe ajo ishte e apasionuar pas publikimit të fotove në Instagram nga pushimet ekzotike, makinave luksoze dhe udhëtimeve për shopping nga disajner te njohur.
Dasma përrallore
Dasma e tyre, në tetor 2018, ishte jashtëzakonisht luksoze në Liqenin e Como në Itali. Veshja e nuses ishte magjepsëse, të ftuarve iu dhanë cigare kubane me emrin e çiftit. Vlerësohet të ketë kushtuar më shumë se 1 milion. Pas vrasjes së tij, shumë pikëpyetje u ngritën.
Pse Ministria e Brendshme e ka lejuar këtë të dënuar kriminel, me lidhje të njohura për trafik droge dhe krim të organizuar, të transferohet në Mbretërinë e Bashkuar, edhe pse shtetasit suedez, si shtetas të BE-së, lejohen të punojnë këtu pa vizë? Si menduan autoritetet që ai kishte krijuar paratë për të financuar stilin e jetës së tij dhe t’i lejonte të blinte një pronë luksoze? Pse u lejua ai dhe bashkëpunëtorët e tij të krijonin një sërë biznesesh të errëta në Mbretërinë e Bashkuar, përmes të cilave kanë lëvizur shuma të mëdha parash? Në kërkimin e përgjigjeve, duhet të kthehemi në mesin e viteve 2000, kur Beqiri, i njohur për miqtë si Aleks, jetonte në Malmo”.
