Joaquin Phoenix, fitoi pak ditë më parë çmimin “Oscar” si aktori më i mirë për rolin e tij në filmin “Joker”. Ai luan rolin e kllounit të famshëm, të cilin diskriminimi dhe dhuna, e shndërrojnë në një vrasës të pamëshirshëm. Por vetë jeta e aktorit, është shoqëruar me shumë ngjarje tragjike.
Phoenix lindi në San Juan të Puerto Rico-s më 28 tetor 1974, në familjen e këngëtarit Xhon Li Botëm dhe avokates Arlin Dunec, që ishin pjesëtarë të lëvizjes kundër-kulturore Hipi. Më pas, ata iu bashkuan një sekti fetar të quajtur “Fëmijët e Zotit”. Jetonin në një rulotë, pasi e propagandonin rrugëve fenë e tyre. Sekti nuk kishte shumë para, ndaj ata mezi e siguronin ushqimin e përditshëm.
Familja u largua nga sekti, për shkak të abuzimeve seksuale që ndodhin shpesh brenda tij. Vitet e fëmijërisë, patën efekte tramatike tek Phoenix dhe vëllai i tij më i madh River. Më vonë u mësua se ata ishin abuzuar seksualisht që në moshën 4-vjeçare. River nisi ta përballojë këtë traumë duke konsumuar shpesh drogë, e cila i shkaktoi edhe vdekjen nga një mbidozë kur ishte vetëm 23-vjeç.
Ndërkohë Phoenix e mbante më përbrenda atë që kishte kaluar. Por edhe ai nisi të abuzojë me alkoolin, duke u shtruar disa herë në qendra rehabilitimi. Phoenix hyn tek ata aktorë, që ka sakrifikuar shumë për realizimin me sa më shumë vërtetësi të roleve të tij. Kështu ai ka punuar disa javë si zjarrfikës, ka qëndruar në qendra të shëndetit mendor, për të vëzhguar sjelljet e të sëmurëve, dhe ka mbajtur dieta të forta për të rënë në peshë. Përtej aktrimit, ai ka si pasion muzikën, dhe konkretisht atë rep. Ndërkohë, ka qenë regjizor dhe producent në disa videoklipe muzikore.
TIRANA TODAY
