Burrë e grua janë plagosur me armë zjarri, nga një person i pa identifikuar në Kamëz. Ngjarja u shënua në rrugën “Kosova”, ndërsa ky është atentati i dytë ndaj tyre. Të plagosurit janë Preng Paluca rreth të 50-ave dhe gruaja e tij, Antoneta Paluca, rreth 41 vjeçe, të cilët aktualisht ndodhen në spital nën kujdesin e mjekëve.
Atentati i dytë ndaj tyre, tre vite më parë i vunë tritol në banesë
Tre vjet më parë, një sasi tritoli është vendosur në banesën e çiftit në Kamëz, ndërkohë që mbrëmjen e djeshme ata u plagosën nga një person i paidentifikuar.
Çifti u dërgua në spital, dhe sipas burimeve, mësohet se bashkëshortja ndodhet jashtë rrezikut për jetën, ndërsa Preng Paluca është në gjendje të rëndë.
Hetimet: Konfliktet e vjetra
Hetimet për zbardhjen e atentatit ndaj çiftit mbrëmjen e djeshme, janë drejtuar në të shkuarën e 50-vjeçarit dhe të konflikteve të vjetra që mund te ketë pasur.
Ngjarja ndodhi shumë pranë banesës së çiftit Paluca, ndërsa nuk përjashtohet mundësia që autori ende i paidentifikuar, të jetë ndihmuar nga një person tjetër.
