Ish-anëtari i Këshillit Mbikëqyrës në Bankën e Shqipërisë, Arben Malaj, ka paditur sot Kuvendin në Gjykatën Administrative. Padia e Malajt vjen pas vendimit të Kuvendit për ta shkarkuar atë nga detyra në BSH. Malaj e ka depozituar vetë padinë në Gjykatën Administrative, i shoqëruar nga avokati i tij, Jordan Daci.
Malaj e kundërshtoi deri në minutat e fundit vendimin për shkarkimin e tij nga Bordi Mbikëqyrës i BSH-së, ku paralajmëroi se do ta ndjekë në rrugë ligjore këtë çështje.
Ai ka qenë një nga veteranët e Partisë Socialiste, dhe ka mbajtur poste të larta në qeverinë e Fatos Nanos. Duket se krisjet me Edi Ramën kanë qenë aq të thella, sa e kanë bërë pedagogun e ekonomisë të largohet përfundimisht nga familja e tij politike.
