Mëngjesin e sotëm u raportua se është plagosur me thikë kryetari i Bashkisë së Divjakës, Fredi Kokoneshi nga Orgest Xhelili, pas një sherri në poliklinikën e Divjakës. I lënduar ka mbetur edhe shoferi i Kokoneshit, Gazmend Bullari. Xhelili ka qenë ish punonjës i IT në Bashkinë e Divjakës dhe është arrestuar.
Gjatë verës së këtij viti, Fredi Kokoneshi u dhunua në zyrën e tij nga nipi i deputetit të PS, Paulin Stërkaj, Dritan Stërkaj, i cili është edhe administrator i një resorti. Denoncimin në atë kohë e beri vetë Kokoneshi më 11 korrik.
Ai pretendoi se një 32-vjeçar, me iniciale D.S, e ka goditur me grushte dhe e ka ofenduar për shkak të detyrës. Kryebashkiaku tha se ngjarja ka ndodhur në zyrën e tij.
Shkak i konfliktit me nipin e deputetit të PS ishin pagesat e taksave ndaj Bashkisë, që resorti ka detyrim.
“Në datë 11.7.2022, në Komisariatin e Policisë Divjakë ka bërë kallëzim shtetasi F. K., 54 vjeç, banues në Divjakë, (kryetar i Bashkisë Divjakë), se shtetasi D. S., 32 vjeç, banues në Divjakë, e ka goditur me grushte dhe e ka ofenduar për shkak të detyrës.
Specialistët për Hetimin e Krimeve në Komisariatin e Policisë Divjakë, nën drejtimin e Prokurorisë Lushnjë, referuan materialet në Prokurori për vlerësim”, thuhet në njoftimin e policisë, për denoncimin e bërë nga kryebashkiaku i Divjakës.
Divjakë / Informacion paraprak
Rreth orës 09:30, në afërsi të bashkisë Divjakë, shtetasi O. Xh., 46 vjeç, dyshohet ka goditur me mjet prerës, shtetasin F. K., me detyrë Kryetar i bashkisë Divjakë dhe shoferin e tij, shtetasin G. B., 45 vjeç. Të dëmtuarit janë transportuar menjëherë dhe po marrin ndihmë mjekësore, në Spitalin Rajonal Lushnjë.
Falë veprimeve të shpejta operacionale të shërbimeve të Policisë, është kapur dhe shoqëruar në Komisariat, për veprime të mëtejshme procedurale, shtetasi O. Xh., si autor i dyshuar i plagosjes. Në vendngjarje ndodhen drejtuesit më të lartë të DVP Fier.
Grupi hetimor, nën drejtimin e Prokurorisë, po punon për sqarimin e plotë të rrethanave të ngjarjes.
