Berisha ka dështuar sërish me denoncimet e ardhura nga qytetari digjital. Nuk kanë qenë të paktat rastet, ku Berisha ka rënë në grackën e personave, të cilët e mashtrojnë me të dhënat që u transmetojnë. Rastet janë të shumta, e madje palët e akuzuara nuk ia kanë përtuar me një kundërpërgjigje të hapur.
Pasi ish-kryeministri Berisha publikoi në ‘Facebook’ një denoncim të qytetarit digjital, ku thuhej se kryebashkiaku i Elbasanit u dhunua nga banda e dhëndrit të Qazim Sejdinit, vjen një reagim nga Gledian Llatja.
Kryetari i Bashkisë së Elbasanit, në një prononcim për ‘BalkanWeb’, ka mohuar kategorikisht faktin që të ketë rënë pre e sulmeve. Sipas tij, qytetari digjital është humbje kohe për një kryetar Bashkie, ku me plot energji dhe përkushtim po u shërben qytetarëve të tij.
“T’u përgjigjesh gënjeshtrave të publikuara nga “Qytetari Digjital” është humbje kohe, por në përgjigje të shqetësimit të qytetarëve të Elbasanit, sqarojmë:
“Çdo gjë e publikuar është absolutisht e pavërtetë dhe qesharake. Por ata që merren me llafe, të vijojnë me llafe se vetëm këtë dinë të bëjnë.
Bashkia e Elbasanit dhe Kryetari i Bashkisë Z. Gledian Llatja, kanë punë për të bërë, si për Elbasanin edhe për mandatin e tretë qeverisës.
“Qytetarin digjital” e presim në Elbasan për “Javën e Verës” të shohim bashkë qytetin, të shijojmë ndryshimet pozitive që vijojnë e me atë rast të shohë me sytë e tij se si Kryetari i Bashkisë së Elbasanit ikën në punë në këmbë dhe lëviz në këmbë, në çdo cep të qytetit apo fshatrave të Elbasanit.
“Qytetari Digjital” është humbje kohe për një kryetar Bashkie, i cili plot energji dhe përkushtim po u shërben qytetarëve të tij, qytetarëve të vërtetë, ata të cilët e zgjodhën për t’i drejtuar dhe shërbyer”, tha më tej ai.
