Gazetari dhe analisti Alfred Lela, teksa ka qenë i ftuar mbrëmjen e djeshme në emisionin ‘Top Show’, ka folur lidhur me një qarkore të publikuar në media, që pretendohet se ka dalë nga PD. Në të sulmohen disa prej gazetarëve të njohur në vend, duke u quajtur mercenarë të kryeministrit Rama.
Lela tha se Basha ka trashëguar një kulturë neo-komuniste, dhe pretendon se njerëzit duhet të jenë luajal me të, dhe ata nuk duhet të jenë luajalë me njerëzit.
“Është kultura komuniste, e kthyer në kulturën neo-komuniste që e trashëgon edhe kreu i opozitës, Lulzim Basha. Është qesharake në fakt, është shqetësuese edhe nuk i kuptoj këta njerëz, edhe vetë z. Basha, që ka këtë iluzionin se njerëzit duhet të jenë luajal me të dhe ata nuk duhet të jenë luajalë me njerëzit”, u shpreh ai.
“Unë publikisht zgjedh ta mbështes Bashën dhe publikisht zgjedh ta kritikojë Bashën”, tha gazetari, ndërsa i pyetur nëse e ka patur ndonjëherë statusin e këshilltarit të Bashës, ai u përgjigj: “Nuk e kam patur asnjëherë, nuk më është kërkuar asnjëherë dhe nuk e kam dashur asnjëherë. Kam patur akses dhe një lidhje që mund të konsiderohet deri dikur miqësore”.
“Bashën e kemi dashur se është kryetari i PD-së, jo se është Basha, dhe këtu hyn kompleksi i Zotit. Z. Basha nuk duhet të mendojë se është PD-ja, Enver Hoxha mendonte se ishte Partia e Punës, t’i japim fund kësaj”, përfundoi Alfred Lela.
