Në 3 gusht 2016, Pëllumb Marnikollaj shkoi në komisariatin “Ano Patissia” në Athinë për të kryer procedurën e detyrimit të paraqitjes. Por, në atë ditë fatale, 28-vjeçari do të futej për të mos dalë më i gjallë prej andej. Vdekja e Marnikollaj është një prej shumë rasteve të ndodhura në burgjet e Greqisë, të cilat edhe sot e kësaj dite mbeten ende të pasqaruara.
Gazetari Aulon Kalaja solli nëpërmjet një dokumentari një investigim të bërë prej tij, mbi vrasjen e lezhjanit Marnikollaj. Sipas tij, kjo është një ngjarje e rëndë që kriminalizon drejtpërdrejtë policinë greke. Ai tregon për Tirana Today se disa policë grekë i torturojnë shqiptarët në mënyra nga më të ndryshmet dhe se në rastin e Marnikollajt ata e kanë dhunuar më parë e më pas mund ta kenë hedhur nga dritarja për alibi.
“Në Greqi ekziston një mënyrë e të pyeturit të të ndaluarve afër një dritareje. Ku fillimisht oficerët e policisë i ngarkojnë akuza për të cilat ata edhe mund të mos i kenë njohur. Por, për shkak se dosjet janë të pazbardhura, policët ia ngarkojnë një personi të caktuar për të dalë dhe më efiçente puna e tyre. Ndërkohë që personi nuk e pranon, ata e afrojnë te dritarja. Fillimisht i nxjerrin kokën, i bëjnë presion duke i thënë që do e hedhin. Më vonë i nxjerrin trupin e më pas e mbajnë të varur.
Ekspertiza mjeko-ligjore shqiptare është tërësisht kontradiktore me atë greke. Por, edhe ajo shqiptare ka të meta, ndaj unë intervistova një ekspert krejt të pavarur, z.Bardhyl Çipi. Dhe ai si një profesionist që është, vjen rreth versionit të asaj çka themi neve. Hedhja nga lartësia mund të ketë ndodhur, por fillimisht ai është dhunuar deri në pikën e vdekjes. Dhe më pas policia për të sajuar shkakun e ngjarjes, e ka marr Marnikollajn dhe e ka hedhur nga kati i dytë i Komisariatit. Duke thënë që donte të arratisej dhe u hodh.”
Kalaja akuzon si bashkëpunëtore me policinë greke edhe Ambasadën Shqiptare, e cila sipas tij është inekzistente për emigrantët shqiptarë. Ndërkohë që numri i shqiptarëve të vrarë në Greqi është afro 178.
“Ambasada Shqiptare atje nuk ka asnjë lloj force, është inekzistente. Është një ambasadë e cila dhe për rastin e Marknikollajt nuk e ka njoftuar familjen. E vërteta është që Ambasada Shqiptare bashkëpunon me policinë greke, të paktën në këtë rast. Se përse e bën, nuk e di. Përsa i përket shtetit shqiptar, politika në tërësi është shumë servile ndaj Greqisë.”
Gazetari shprehet për Tirana Today se ajo që kërkon të përcjellë me dokumentarin e tij, është një ndërgjegjësim që të mos ketë më shqiptarë të vdekur nga policia greke. Kjo sepse siç edhe ai thotë, nëse situata vazhdon e njëjtë e nuk merren masa, numri i të vrarëve veç do të rritet.
“Policia greke ka një pushtet të pakufishëm, ndaj kushtet janë shumë të vështira për të burgosurit shqiptarë. Shqiptarët janë të pambrojtur në Greqi, janë viktima të racizmit, dhunës policore, të gardianëve të burgut dhe të ushtrisë greke. I dimë dhe rastet që janë vrarë shqiptarë në pikat kufitare. Po na vriten njerëzit si krerë bagëtish në Greqi, kjo është historia e shqiptarëve atje. Teksa në çdo vend të botës komisariati i policisë është vendi më i sigurt, për shqiptarët komisariatet në Greqi janë një mallkim.”/TIRANA TODAY
