Ish-presidenti i Këshillit Evropian, Donald Tusk ka reaguar ashpër në lidhje shembjen e Teatrit Kombëtar në Tiranë.
Përmes një postimi në Facebook, Tusk e cilëson këtë si një akt kundër vlerave evropiane. Ai gjithashtu dënon dhunën e përdorur kundër protestuesve dhe të gjithë të pranishmëve.
Në postimin e tij, Tusk shpreh mbështetjen e tij për opozitën dhe “luftën e saj demokratike për një Shqipëri më të mirë”.
Postimi i plotë:
Dënoj shembjen e Teatrit Kombëtar në Tiranë, të dielën, një akt kundër vlerave europiane, si ruajtja e trashëgimisë kulturore, shteti i së drejtës dhe dialogu transparent. Intimidimi dhe përdorimi i dhunës kundër protestuesve, shoqërisë civile, artistëve, si dhe politikanëve të opozitës është i papranueshëm. Sundimi i ligjit, pavarësia dhe liria e medias, si dhe lufta kundër korrupsionit duhet të mbizotërojnë për perspektivën evropiane të Shqipërisë. Shpreh mbështetjen time për PD në luftën e saj demokratike për një Shqipëri më të mirë.
