Gjenerali iranian Qassem Soleimani, i cili u vra në një sulm ajror amerikan në Irak në 3 janar, nuk ishte thjesht një organizator famëkeq terrorist dhe një nga zyrtarët më të fuqishëm të regjimit. Ai ishte gjithashtu një nga antagonistët e mediave sociale të Presidentit Trump.
Teksa ekspertët ndërkombëtarë e kanë njohur prej kohës Soleimanin si udhëheqësin e elitës Kuds dhe përgjegjës për shumë nga konfliktet, një pjesë e amerikanëve e kanë dëgjuar për herë të parë emrin e tij në 2018-të. Kohë kur ai filloi të debatojë me Trump nëpërmjet disa memeve në Instagram.
Në atë vit, Administrata Trump ishte e angazhuar në një fushatë presioni kundër Iranit, presidenti i të cilit Hassan Rouhani paralajmëroi në korrik se “Amerika duhet të dijë që paqja me Iranin është nëna e të gjithë paqes, dhe lufta me Iranin është nëna e të gjitha luftërave.”
Kësaj deklarate Presidenti Trump iu përgjigj me anë të një Twitter-i me gërma kapitale.
“Drejtuar Presidentit iranian Rouhani: ASNJËHERË, MOS GUXO TË KËRCËNOSH SHTETET E BASHKUARA. NDRYSHE DO TË VUASH PASOJAT, SI PAK KUSH QË KA VUAJTUR PËRGJATË HISTORISË MË PARË. NE NUK JEMI MË NJË VEND QË DO TË DUROJË FJALËT TUAJA TË MARRA PËR DHUNË DHE VRASJE. BËNI KUJDES!”
Disa ditë më pas, Soleimani bëri një postim për të mbrojtur presidentin iranian.
“Nuk është në dinjitetin e presidentit tonë që të të përgjigjet ty. Nëse ti nis një luftë, ne do ta përfundojmë atë. Ti e di që kjo luftë do të shkatërrojë çdo gjë që posedon.”
Në një tjetër postim, Soleimani shkruan: “Z. Trump, kumarxhi! Mos kërcënoni jetën tonë! Ju jeni mirë të vetëdijshëm për fuqinë dhe aftësitë tona në rajon. Ju e dini se sa të fuqishëm jemi në luftë asimetrike.”
Edhe pse ishte komandant i një niveli të lartë në një regjim që i ndalon qytetarëve thuajse të gjitha mediat sociale, Soleimani kalonte kohë në Instagram. Ku nëpërmjet disa fotove dërgonte mesazhe veçanërisht ndaj Amerikës. Siç ishte kjo foto e marr nga filmi “Olympus Has Fallen”, ku duket Shtëpia e Bardhë teksa shpërthen. Dhe para saj qëndron Soleiman me një radio dore marrëse-dhënëse në duar. Ndërsa në tekst shkruhet: Ne do ta shtypim Amerikën me këmbët tona.”
Debati në rrjete sociale vazhdoi edhe me tërheqjen e Trump nga një marrëveshje tre vjeçare bërthamore me Iranin. Ku ai kërcënoi dënime të reja ekonomike mbi vendin. Në nëntor të 2018-ës Trump postoi një foto të vetes me sfond të stilit “Game of Thrones”, duke shkruar “Sanksionet janë duke ardhur.”
Njëjtë veproi edhe Soleimani, me anë të nje meme, ku shkruante “Do të qëndroj kundër teje.”
Por, në prill Instagram pezulloi llogarinë e tij pasi ishte në kundërshtim me politikat e kompanisë ndaj ndalimit të promovimit të dhunës./ Burimi: The Washington Post Përshtati: TIRANA TODAY
