Tashmë është hapur zyrtarisht gara për drejtuesin e Byrosë Kombëtare të Hetimit. Më herët, ka qenë Ambasada e SHBA e cila i ka mëshuar fort faktit se BKH do të jetë e ngjashme me FBI-në amerikane, e cila heton krime të nivelit të lartë te Shtetet e Bashkuara.
Po kështu, në një njoftim në Facebook, Ambasada citon se Shqipëria është në hapat e fundit të zbatimit të Reformës në Drejtësi. Ndaj, kushdo që do të bëhet pjesë e historisë, është koha për të aplikuar tani.
Ngritja e Byrosë Kombëtare të Hetimit, e njohur ndryshe si FBI shqiptare, pritet të shënojë një kthesë dhe të hapë një kapitull të ri në historinë e tranzicionit shqiptar, sa i takon luftës kundër krimit të organizuar, mafies dhe korrupsionit elitar.
Njoftimi i Ambasadës Amerikane
Jeni prokuror, punonjës i Policisë së Shtetit apo Policisë Gjyqësore, i gatshëm për të luftuar për drejtësinë që çdo shqiptar meriton? Jeni person me integritet, përvojë profesionale dhe një sërë aftësish të nevojshme për të drejtuar dhe frymëzuar një grup prej rreth 60 hetuesish të Byrosë Kombëtare të Hetimit? Nëse mendoni se përmbushni kriteret për të drejtuar një institucion të rëndësishëm të programit kundër korrupsionit në Shqipëri, aplikoni për pozicionin e Drejtorit të Byrosë Kombëtare të Hetimit (BKH). Shqipëria është në hapat e fundit të zbatimit të reformës në drejtësi. Bëhu pjesë e historisë, apliko tani: https://bkh.al/aplikim/
