Një ngjarje e rëndë u regjistrua mbrëmë në Korçë, teksa një vajzë 4-vjeçare është tentuar të rrëmbehet ndërsa ishte me nënën e saj.
Ishin banorët e zonës ata që arritën ta ndalojnë autorin, duke ia kthyer vajzën nënës së saj. Xhoniel Qelemeni, banor i kësaj lagje tregon se si arriti të shpëtojë vajzën nga duart e rrëmbyesit.
I riu thotë se e ka ndjekur me vrap rrëmbyesin, deri sa ai u lodh. Në atë moment ka ndërhyrë edhe policia.
“Ishte nëna dhe vajza kaluan këtu në rrugë. Unë isha me dy shokë, po rrija tek bordurat, pashë një tip që kaloi këtu, vajti të rrëmbente çupën.
I thirrëm ne dhe ai u tremb, ne e ndoqëm me vrap, ngjarja ka ndodhur rreth orës 09:20. Djalin nuk e njihja, e ndoqa me vrap derisa u lodh, më ndihmuan edhe shokët, e kapëm. Në ato momente ka ndaluar policia. Nëna po thërriste, u tremb, u tromaks. Në ato momente vajza ishte e trembur. Në këtë lagje nuk kishte ndodhur më parë kjo gjë”, tha ai.
