Aktori i njohur i humorit Arben Shaka, nuk ka mundur dot të fitojë betejën me Covid-19. Mjeshtri i pantomimës dhe humorit, u shua në moshën 70-vjeçare. Lajmin e hidhur e kanë bërë me dije familjarët e aktorit, përmes një postimi në rrjetin social Facebook.
“Lamtumirë mik i vyer Arben Shaka. U rrita qysh fëmijë me humorin tënd të bukur dhe të shëndetshëm aty, në Cirkun e Tiranës. Si komshi, kaluam bashkë plotë vite miqësie duke parë tek ty jo vetëm shpirtin e mirë të një artisti të jashtëzakonshëm, por mbi të gjitha pashë tek ty, një njeri me zemër të madhe, bujare dhe fisnike.
E hidhur kjo ikja jote e beftë dhe e heshtur në një moshë relativisht ende të re. Do të mbaj mend gjithmonë Benin shakator, plot humor e ngazëllyes, i pafjalë dhe me pafajësinë e një fëmije, që edhe gjërat serioze i kaloje me shumë humor e sportivitet. Sa do më mungosh Mik! Të qoftë dheu i lehtë Artist i mirë….. R.I.P“, shkruan Ilir Çumani në mesazhin e tij në rrjetet sociale.
Në moshën 17-vjeçare, Arben Shaka nisi si aktor profesionist në Estradën e Tiranës. Shaka e shfrytëzoi aftësitë e tij interpretuese dhe argëtuese edhe në Cirkun e Tiranës, duke luajtur shpesh kllounin. Gjithashtu, ai ka interpretuar dhe skeçe, dialogë, kupletë dhe komedi.
Në kinematografi, Arben Shaka u bë i njohur në filmat: “Përse bie kjo daulle”, “Odiseja e tifozëve” dhe “Cirku në fshat”. Gjatë viteve të diktaturës komuniste, Shaka ishte një personazh i dashur edhe për fëmijët, ku ka shkruar dhe skenarë të filmave vizatimorë si: “Endrra në diell”, “Tiktaku i fundit”, “Nevoja të ndihmon”, etj.
Pas rrëzimit të regjimit komunist në Shqipëri, Arben Shaka emigroi me familjen e tij në Greqi në vitin 1998. Edhe pse nuk mundi të luante sërish në filma, ai shfrytëzoi pasionin e tij për pikturën dhe fotografinë. Me ndihmën e fëmijëve të tij, Shaka mundi të realizonte një program me pantonimë dhe muzikë, e cila u shfaq në një lagje të Athinës. Ai jetoi për 15 vite në provincën e Lutrakit. Për karakterin në role, Shaka quhet “Aktori serioz i roleve komike”.
