Bashkëshorti i 39-vjeçares së ndjerë e cila u vra nga kunati në Paskuqan, ndodhej në burg i dënuar për drogë. Kur kishte rënë brenda në burg, vëllai i kishte lënë porosi vëllait që të ruante të gjitha lëvizjet e gruas. Por në një moment, 6 muaj më parë mes Erdet Çapokut dhe kunatës së tij ka pasur një debat, pasi Enkeleda Çapoku e akuzoi se e përndiqte. Erdet Çapoku e goditi kunatën në rrugën kryesore mes bashkisë së Kamzës dhe komisariatit.
Enkeleda Çapoku e denoncoi për përndjekje dhe çështja përfundoi në polici. Në komisariat kunati ka thënë se e ruante 39-vjeçaren, pasi e kishte porosi nga vëllai që ti ruante nderin. Enkeleda Çapoku u largua nga banesa ku jetonin të gjithë bashkë më parë, dhe jetonte vetëm me nënën e saj dhe vajzën 17-vjeçe me qira.
Autorit ia kishte lënë porosi i vëllai, që të dhënat që merrte t’ia dërgonte në burg. Kjo ka sjellë edhe përplasjen mes tij dhe kunatës që përfundoi me vrasjen e 39-vjeçares.
Autori i krimit në Paskuqan, Erdet Çapoku, punonte si fatorino. Pas krimit makabër, ai është shpallur në kërkim. E ndjera punonte në një fasoneri këpucësh së bashku me vajzën, teksa burrin e kishte në burg të dënuar me 10 vite për drogë.
Konflikti mes kunatit dhe kunatës kishte nisur disa muaj më parë, pas porosisë së burrit të 39-vjeçares. Ai mësohet se kishte porositur vëllanë që të ruante dhe të kontrollonte të gjitha lëvizjet e gruas. Po kështu informacionet apo fotot t’ia dërgonte në burg nëse e tradhtonte.
