Franca ka regjistruar sot bilancin e dytë më të rëndë në Evropë nga koronavirusi, pas Mbretërisë së Bashkuar.
Sipas mediave vendase, në 24 orët e fundit kanë humbur jetën 761 persona (8 më shumë se dje), duke e çuar në 18,681 numrin total të viktimave të shkaktuara nga COVID-19.
Ndërkohë janë regjistruar 1,909 raste të reja, teksa ka shkuar në 147,969 numri total i rasteve të regjistruara nga vendi.
Deri më tani në Francë janë shëruar 34,420 persona të infektuar nga virusi vdekjeprurës. Numri i rasteve ende aktive në vend është 94,868, ndërsa 6,027 persona ndodhen në gjendje kritike për jetën.
Bilanci më i rëndë në Evropë për sot u shënua nga Mbretëria e Bashkuar, e cila regjistroi 847 viktima në 24 orët e fundit.
Franca është vendi i katërt në botë më i prekur nga COVID-19, pas SHBA-ve, Italisë dhe Spanjës. Ndërkohë me këtë ritëm pritet që shumë shpejt Franca të kalojë edhe Spanjën, e cila renditet e treta për numrin më të madh të viktimave.
Më shumë se 2,2 milionë njerëz nga e gjithë bota janë prekur nga koronavirusi, ndërsa mbi 152 mijë persona kanë humbur jetën.
