Gazetari grek Panajotis Savidis ka hasur në telashe teksa i është refuzuar kalimi në Kakavijë nga autoritetet shqiptare. Savidis ka tentuar të vijë sërish në shtetin tonë, për të raportuar për ceremoninë që do të mbahet për të dyzetat e Kostandinos Kacifas.
Ndërsa Protothema, gazeta për të cilën ai punon, e ka cilësuar si një rast të paprecedentë ndalimin e grekut, i cili ishte nisur për në Bularat. Madje, ajo shkon më tej teksa shkruan se gazetari ishte nisur drejt Vorio Epirit, për ceremoninë memoriale 40 ditë pas varrimit të Kacifas.
Panajotis Savidis u mbajt për rreth 10 minuta nga autoritetet shqiptare në pikën kufitare të Kakavijës, ku u pyet për statusin e tij dhe arsyen e vizitës në Shqipëri, raporton Protothema.
Media greke shkruan se shqiptarët kontrolluan çantën e gazetarit dhe kërkuan që ai të kishte një licencë të posaçme për regjistruesin e kasetës që kishte me vete.
Më tej, mësohet se autoritetet në Kakavijë kanë komunikuar me zyrat qendrore në Tiranë. Më pas e kanë pyetur gazetarin grek për raportimet e tij mbi vdekjen e Kacifas, duke sqaruar se ata janë informuar për gjithçka.
Pas ngjarjes në Bularat, duket se shtetasit grekë kanë hasur në vështirësi më të madhe në kalimin e kufirit, teksa janë pyetur nga autoritetet shqiptare se ku duan të shkojnë dhe nëse mund ta vërtetojnë atë. Po ashtu, Protothema shkruan se grekët paralajmërohen se mund të shkojnë kudo, përveçse në Bularat, në të kundërt do të merren masa ndaj tyre.
Siç duket në dokumentin e publikuar më lart, autoritetet shqiptare kanë ndaluar hyrjen e gazetarit grek, me arsyetimin se “konsiderohet si kërcënim për sigurinë publike, sigurinë e brendshme, shëndetin publik ose marrëdhëniet ndërkombëtare të Republikës së Shqipërisë”./ Përshtati TIRANA TODAY
